Atuartunuttuartunut suliffimmik misiliisunut Sullivimmi avatangiisit pillugit inatsip atorneqarnera

1. Aallaqqaasiut

Ilitsersuut Sullivinnik Nakkutilliisoqarfimmit suliarineqarpoq aamma sullivinnik avatangiisit pillugit inatsimmi malittarisassat pillugit ilitsersuutaalluni, atuartunut suliffimmik misiliineranni atuuttoq.

2. Suliassaqarfik

Atuartut ass. 9. – 10. klassimi suliffeqarfimmi inuussutissarsiuteqarfiusumi suliffimmik misiliinernut sivikinnerusunut atatillugu suliffimmi misiliisinnaapput.

Malittarisassat immikkut ittut inuusuttut suliaannut tunngasut, taakkununnga ilanngullugit piffissaq suliffiusussamut malittarisassat atuartut sulisitsisoqarlutik sulinerannut atuupput.

Sullivimmi avatangiisit pillugit inatsit malillugu paasissagaanni, sulisitsisoqarluni sulineq pineqarnersoq aalajangiussisuussaaq

• inuusuttoq sulissaaq sulisut suliaannut sanilliunneqarsinnaasumik imaluunniit assingusumik suliaqarluni
• inuusuttoq sulisinnaassuseqarnissaminik pisussaaffeqarpoq
• inuusuttoq ilitsersorneqarsinnaassaaq aamma nakkutigineqarsinnaassalluni
• suliaqarfeqartinneqassaaq atortunillu pisarialinnik atuisinnaatitaalluni.

Sulisitsisup aamma inuusuttup sulinera pingaaruteqarpoq iluaqutigisinnaassagaa. Nalorninartoqartillugu pingaaruteqarpoq, inuusuttoq akissarsitinneqassasoq arlaatigulluunniit akilerneqassasoq.

Sulisitsisoq sullisissangaanni tamatigut sukumiisumik naliliisoqartarpoq. Taamaattumik sulinermi pissutsini ataasiakkaani suliaqartoqarsinnaavoq sulisitsisumut sullissinertut taaneqartunik. Killormut saatsikkaanni suliassaqarsinnaavoq sulisitsisumut sullissinertut isigineqanngitsunik.

Atuartut suliffimmik misiliinerat sukumiisumik naliliineq malillugu sulisitsisumut sulinertut isigineqassaaq.

Atuartut atuartinneqartussaatitaasut sulisinnaanissamut pisussaaffeqarput atuartitsinermut taarsiullugu suliffimmik misiliinerminni.

Taamaattoq suliffeqarfimmi paaqqinnittarfimmiluunniit atuartoq sulinermi peqataanngitsoorsinnaavoq, kisianni inersimasumit suleriaatsini assigiinngitsuni malinnaatinneqarsinnaalluni. Pisuni taakkunani, atuartup malinnaaffigisaani sulivimmi avatangiisit pillugit inatsisit inuusuttup sulinera pillugu immikkut malittarisassaat atuutinngillat.

Assersuutigalugu atuartoq politiini suliffimmik misiliippat, atuartorlu politiit biiliinut ilaalluni angalaaqataappat imaluunniit ataatsimeeqataappat politiit suliaannik suliaqanngikkaluarluni sulisitsisumut sullissineq pineqanngilaq. Kisianni atuartoq allaffimmi suliaqarpat tassunga ilanngullugu kopeerippat, allakkanik nassiussippat il.il. sulisitsisumut sullissineq pineqarpoq.

Naak atuartoq malinnaaginnaraluartoq taamaallillunilu sulinermi peqataanngitsoq suliffimmik misiliinissaanut pilersaarusiornermi anguniarneqassaaq atuartoq tupannartunik imaluunniit pisunik sakkortuunik misigisaqartinneqassanngitsoq.

Immikkut aaqqissuussamik suliffimmik misiliineq sulisitsisumut sulinerunngitsutut sukumiisumik naliliiffigineqarsinnaavoq. Ass. suliffimmik misiliisuni holdi angisuujuppat immikkut aaqqisuussamik ingerlatsisoqarsinnaavoq, sulisut suliarisartagaannit allaanerusumik sungiusartoqarluni, taamaallaat suliffimmik misiliisut suliassaannik, sungiusaatillu atuartitsinertut atussallutik.

Atuartut suliffeqarfinnut aamma paaqqinnittarfinnut attaveqarneri aamma suliffeqarfinnut sivikinnerusumik pulaarnikkut ingerlanneqarsinnaavoq. Pisuni taakkunani atuartoq sulisitsisumut tunngaviatigut sullissisuunngilaq.

Inuusuttut suliffimmik misiliisut sullissisup nammineq illuani imaluunniit ilaqutariit suliffeqarfiutaanni suliaqarunik tamanna Kalaallit Nunaanni inuusuttut suliaat pillugu nalunaarummi ilaatinneqarpoq. Taamaattoq ilaannikkut imaluunniit sivikitsumik sulineq ilaanngilaq, isumannaallisaanikkut- aamma peqqissutsikkut illersorneqarsinnaasumik sulinerup ingerlanneqarnissaanut ilitsersuilluarneq aamma pitsaasumik nakkutilliineq qulakkeerneqarsinnaalluni.

3. Ukiutigut killissaatitat

Tulliuttuni atuartut suliffimmik misiliisussat 13-inik ukioqalersimassasut naatsorsuutigineqassaaq. Tassunga ilanngullugu pingaarnertut malittarisassaq tassaavoq, atuartitsinermut pisussaaffik 10. klassip naanerani naammassissasoq.

Suliffeqarfinnut sivikitsumik pulaarnermi suliaqartussaanngiffimmi, sullivinni avatangiisit pillugit inatsit atorneqassanngilaq, taamaattumillu klassini minnerusuni ingerlanneqassalluni.

Inuussutissarsiutigalugu sulinermut appasinnerpaamik inuusuttoq 13-inik ukioqarnissaa atuuppoq.

4. Suliat/suliassat sorliit

13-inik ukiullit ataallugit

Atuartut 13-init ataallugit ukiullit sulisitsisumut sullisseqqusaanngillat.

Atuartunut 13-it ataallugit ukiulinnut suliffimmik misiliinermik ingerlatsineq taamaattumik ima aaqqissuunneqassaaq, sullivimmi avatangiisinut inatsip malillugu sulisitsisoqarluni atuartoq sulissanngitsoq.

Tamaatuma qanoq suliarineqarsinnaaneranut assersuut,

• Immikkut aaqqissuussamik ingerlatsilluni suliffimmik misliineq sulineq suliffimmik misiliineq siunertaralugu aalajangersimasumik isikkoqartinneqartoq atuartitsinermik ingerlatsiffiusoq suliffimmik misiliisunik peqataasoqarpoq
• Sulinermut assingusunik ilusilimmik suliffimmi misiliinermi sulisut suliassaraluannik inuusuttut suliaqanngiffiani.
• Suliffinnni/misiliiffinni atuartut suliassavinnik suliavinnik suliaqataaffiginngisaanni takornarniartitsineq.

13-inik ukiulik

Atuartut 13-inik ukiullit inuussutissarsiornikkut sulianik oqinnerusunik suliaqarsinnaapput. Kalaallit Nunaanni inuusuttut sulisarnerat pillugu nalunaarummi suliat sorliit inuussutissarsiutitigut suliattut oqinnerusutut naatsorsuutigineqarnersut allattorsimaffeqarpoq.

Atuartut 13-inik ukiullit suliffimmik misiliinermi aamma sulianit allattorsimaffimmi taaneqartunit oqinnerusunik allatut isikkulinnik aamma suliaqarsinnaapput.

Piumasaqaataavoq, suliat atuartup isumannaatsuunissaanut aamma peqqissusaanut aarlerinartuussanngitsut. Atuartoq taamaattumik maskiinat aamma stoffit, atortut ulorianartut qanitaanni suliaqassanngilaq kiisalu oqimaatsulerissanani.

14-inik imaluunniit 15-inik ukiulik

Atuartut 9. aamma 10. klassimi 14-inik ukioqalersimasut atuartut suliffimmik misiliinerminni oqinnerusutut isigineqanngitsunik suliaqarsinnaapput. Naatsorsuutigineqarpoq, suliat ulorianartuussanngitsut imaluunniit suliassanut aalajangersimasunut nalunaarummi inerteqqutaasunik suliaqassanngitsut.

Atuartut taamaalillutik periarfissaqarput

• maskinanik uloriananngitsunik atuinissaminnut
• stoffinik atortunillu ulorianannginnerusunik atuisinnaasut.

Qillerutit innaallagiatortut tigummiartakkat assersuutigineqarsinnaapput.

5. Suliassat ilaannik suliaqaqqusaannginneq

Inuusuttut tamarmik 18-it ataallugit ukiulinnut sulianut assigiinngitsunut inerteqqutit arlallit atuupput. Suliassaqarpoq inuusuttunit suliarineqarsinnaanngitsunik isumannaallisaanikkut- aamma peqqissutsikkut illersorneqarsinnaanngitsunik nalinginnaasumik ulorianartutut imaluunniit ajoqutaasinnaasutut nalilerneqartunik. Tassunga ilanngullugu inuusuttut niuertarfinni assigiinngitsuni ammanerisa nalaanni piffissani aalajangersimasuni kisimiillutik suleqqusaanngiffiini.

Malittarisassat taakkua aamma atuartunut suliffimmik misiliisunut atuupput.

Kalaallit Nunaanni inuusuttut suliaat pillugit nalunaarut malittarisassat nassuiarneri pillugit innersuussutigineqarpoq.

6. Piffissaq suliffiusussaq pillugu malittarisassat

Inuusuttunut 18-it ataallugit ukiulinnut piffissamut suliffiusumut malittarisassat immikkut ittut atuupput. Inuusuttut 13-15-inik ukiullit imaluunniit atuartussaatitaanermi pineqartut akornanni aamma inuusuttut 15-inik ukioqalereersimasut atuartussaatitaanermi pineqanngitsut immikkoortinneqartarput. Naatsorsuutigineqarpoq, atuartut suliffimmik misiliisut 13-inik ukioqalereersimassasut kiisalu 10. klassimi atuartut 15-inik ukioqalersimassasut.

Gruppinut tamanut, suliffimmik misiliineq sapaatip akunneranik atuarnermik taarsiissanngitsoq, aamma ullormut sapaatip akunneranullu piffissaq suliffiusoq 8 tiimimik aamma 40 tiimimik qaangerneqassanngitsoq atuuppoq. Tassannga piffissaq atuartut atugassaat peerneqassaaq.

Suliffimmik misiliiffiusuni pisuni atuartup sulisitsisoqarluni suliffigisaani imaluunniit pisuni allani kisimiilluni malinnaaffiginninnerani, piffissaq taannaavoq atuartup sulinngikkaluarluni suliffeqarfimmiiffia, atuartitsinertut isigineqartoq.

Atuartut eqqaaneqartutut 13-init ataallugit ukiullt sulisitsisumut sullisseqqusaanngillat.

9. klassi

Suliffimmik misiliinerup atuartitsineq sapaatip akunneranik taarsissappagu, taava 9. klassimi atuartut ullormut 8 tiimi aamma sapaatip akunneranut 40 tiimi sulisassapput.

Atuartut nal. 20.00 aamma nal. 06.00 akornanni suleqqqusaanngillat. Ullormut piffissaq qasuersaarfissaq ataqatigiittumik minnerpaamik 14 tiimiussaaq. Sapaatip akunnerata iluani atuartoq ullunik marlunnik sulinngiffeqassaaq.

Inuussutissarsiutini unnukkut- aamma unnuakkut suliffiusuni, atuartut nal. 20.00 kingorna aamma nal. 6.00 sioqqullugu suleqqusaanngillat. Imaassinnaavoq iffiortutut sulineq, paaqqinnittarfiit kiisalu akunnittarfiit- aamma neriniartarfii. Taamaattoq atuartoq piffissami suliffeqarfimmiissaaq takuniarlugu suliap ingerlanneqarnera nammineq peqataanngikkaluarluni. Eqqaaneqartutut piffissaq malinnaaffigineqartoq piffissamut tamakkiisumik suliffiusumut ilanngunneqassaaq.

10. klasse

10. klassimi atuartut ullormut 8 tiimi aamma sapaatip akunneranut 40 tiimi sulisinnaapput.

Atuartut pingaarnertut nal. 20.00 aamma nal. 06.00 akornanni suleqqqusaanngillat.

Taamaattoq inuussutissarsiutinut unnukkut- aamma unnuakkut suliffiusunut immikkut atuuttoqarpoq. Kalaallit Nunaanni inuusuttut suliaat pillugit nalunaarut malittarisassat nassuiarneri pillugit innersuussutigineqarpoq.

Ullormut piffissaq qasuersaarfissaq ataqatigiittumikminnerpaamik 12 tiimiussaaq.

Sapaatip akunnerta iluani atuartoq ullunik marlunnik sulinngiffeqassaaq. Taamaattoq sapaatip akunneranut freerfiit kinguartinneqarsinnaapput imaluunniit allanngortinneqarlutik. Taakkua atuartunut piffissami sivikitsumi suliffimmik misiliisunut nalinginnaasumik atuutinngillat.

Kalaallit Nunaanni inuusuttut suliaat pillugit nalunaarut malittarisassat nassuiarneri pillugit innersuussutigineqarpoq.

7. Sulisitsisup pisussaaffii

Sulisitsisut inuusuttunik 18-it inorlugit ukiulinnik sulisullit sullivimmi avatangiisit pillugit inatsit malillugu immikkut pisussaaffeqarput. Malittarisassat taakkua aamma sulisitsisunut atuartunik suliffimmik misiliisulinik suliffilinnut atuuppoq.

Sulinerup illersorneqarsinnaanera

Sulianik toqqaanermi aamma suliap aaqqisuunnerani sulisitsisup qulakkiissavaa, inuusuttup suliani isumannaallisaanikkut- aamma peqqissutsikkut tamakkiisumik illersorneqarsinnaasumik ingerlanneqarsinnaanera. Sulisitsisup suliap ulorianassusaanik naliliinerit tunngavigalugit isumannaallisaatit pisariaqartut aalajangiiffigissavai.

Sulisitsisup aarlerinaatit immikkut ittut inuusuttup misilittagaqannginneranit aamma suliap imarisaa ulorianartoq pillugu ilisimasaqannginnerat pissutigalugu pisartut eqqumaffigissavai. Taassuma saniatigut inuusuttut eqqarsartaatsikkut imaluunniit timikkut inerilluarsimanngitsut eqqarsaatigineqassapput. Sulisitsisup aamma timikkut, uumassusikkut, kemiskitigut kiisalu eqqarsartaatsikkut sunniutit inuusuttumut piffissami qanittumi aamma ungasissumi sunniuteqarsinnaasut eqqarsaatigineqassapput.

Sulisitsisup aamma inuusuttut ilinniartilluarneqarnissaat aamma ilitsersuunneqarnissaat qulakkiissavaat kiisalu inuusuttoq inummik 18-inik ukioqalereersimasumit suliffimmut pisariaqartunik ilisimannilluartumit nakkutigilluarneqassasoq qulakkiissallugu.

Nalunaarutiginninneq

Sulisitsisut inuusuttunik suliffimmik misiliisullit inuusuttut angajoqqaavi imaluunniit akisussaasui suliaq pillugu nalunaarfigissai. Tassunga ilanngullugu sulinermut attuumassuteqarsinnaasut sulinerup sivisussusaa, ajutoornerit- aamma napparsimanissamut ulorianartuusinnaasut aamma isumannaallisaanikkut- aamma peqqissutsikkut isumannaallisaatit pillugit ilisimatitsisoqassaaq.

Sulisitsisoq naliliippat sulineq atuartumut ulorianartortaqanngitsoq, angajoqqaat taamaallaat, sulisitsisup taanna inuusuttoq sulisorigaa kiisalu sulinerup sivisussusaa pillugu nalunaarfigineqassapput.

Pisuni sulisitsisoq naliliippat sulineq pineqartumut ulorianartuusoq, sulisitsisup paasissutissat, nalunaarutiginninnermut ilaasut atuarfimmut tunniutissavai. Tamatuma kingorna atuarfik atuartup suliffimmik misiliineranut tunngasut pillugit atuarfiup angerlarsimaffianut nalinginnaasumik nalunaarutiginninneranut atatillugu angajoqqaanut paasissutissiissaaq.

Taamaattoq sulisitsisoq nalunaarutiginninnerup angajoqqaanut akisussaasunulluunniit apuunneqarnissaanut suli akisussaaffeqarpoq.

Sulisitsisup nalunaarutiginninnissaata ilusissaa pillugu piumasaqaateqartoqanngilaq.

Nalunaarutiginninneq naapertuuppat oqaasiinnakkut pisinnaavoq.