Sanaartortitsisut sanaartugassani akisussaaffiat

Isumannaallisaaneq peqqissuserlu pilersaarusiornissaannut ataqatigiinnissaannullu sanaartortitsisup akisussaaffia pillugu ilitsersuut atuutissaaq naatsorsuutigineqarpat, minnerpaamik suliffeqarfiit marluk ataatsimoorluik inuit 11-it ataatsikkut illuliorfimmi- imaluunniit sanaartorfimmi sulitikkaat.

Malittarisassat pingaarnerit

Sanaartortitsisup akisussaaffigaa – isumannaallisaanerup peqqissutsillu pilersaarusiorneratigut aamma ataqatigiissaarneratigut – sanaartorfimmi sulineq isumannaatsumik- aamma peqqissutsikkut illersorneqarsinnaasumik ingerlanneqarnissaanut tunngavissamik qulakkeerinninnissaq. Sanaartorfissap nassataraa, sanaartortitsip akisussaaffia, qulakkiissallugu:

• Tassa – sanaartorfissaq pilersinneqarpat – ataqatigiissaarisumik toqqaasoqassaaq sanaartornermi isumannaallisaanermik peqqissutsimillu ataqatigiissaarisussamik.
• Ataqatigiissaarisoq inatsisitigut piginnaasaqassasoq.
• Ataqatigiissaarisup isumannaallisaanermik aamma peqqissutsimut tunngasunik sanaartornermi sulianik ataqatigiissaarineq, malittarisassani allaqqasutut.
• Ataqatigiissaarisup isumannaatsuunissamut peqqissutsimullu pilersaarusiussasoq.
• Sanaartorfinni sulisitsisunik isumaqatigiissusiortoqassasoq immikkoortut ataatsimoorfiit annertussusaat akisussaaffillu pillugit aamma ataatsimut isumannaallisaanermi iliuusissaliortoqassasoq.
• Illuliorfinni- imaluunniit sanaartorfinni isumannaallisaanermut aamma peqqissutsimut pilersaarut ingerlaavartumik ataqatigiissaarisumit suliarineqartassasoq.
• Ataqatigiissaarisoq minnerpaamik ullut 14-ikkaarlugit suliffeqarfinnut tamanut aamma sanaartorfimmi sullivinni avatangiisinut tunngasunik suliaqartunut isumannaallisaaneq pillugu ataatsimiititsisassaaq.
• Ataqatigiissaarisoq sanaartorfimmi suliffeqarfinnut ingerlaavartumik najuuttassasoq attaveqartassasorlu.

Immikkoortut ataasiakkaat immikkoortuni tulliuttuni ingerlanneqartassasut.

Sanaartortitsisup sanaartortitsisutut akisussaaffik malillugu allanut inuttut suliffeqarfinnullu suliassat suliaritissinnaavai, kisianni sanaartortitsisoq inatsisitigut akisussaaffimmik allanut tunniussisinnaanngilaq. Sanaartortitsisup suliani allanut suliaritikkunigit, sanaartortitsisoq pilersaarusiormerup aamma sanaartornerup nalaani najoqqutassat suliallu annertussusaat aalajangersassavaa.

Sanatitsisup, sanaartorneq aallartitsinnagu, illuliorfissaq- imaluunniit sanaartorfiusussaq Sullivinnik Nakkutilliisoqarfimmut nalunaarutigissavaa,

• sulineq ullunik 30-nik sivisunerussaa aamma minnerpaamik inuit 20-at ataatsikkut sulinissaat naatsorsuutigineqarpat, imaluunniit
• sulinerup annertussusaa ullunik suliffiusussanik 500-nik qaangerneqarnissaa naatsorsuutigineqarpat.

Malittarisassat pingaarnerit, ukua pillugit:

• Ataqatigiissaarisumik toqqaaneq 
• Ataqatigiissaarisup piginnaasai 
• Sanaartortitsisup sanaartornerup nalaani ataqatigiissaarinissamut akisussaaffia 
• Sanaartornerup nalaani ataqatigiissaarineq 
• Isumannaallisaanermi ataatsimiinnerit 
• Isumannaallisaaneq pillugu siunnersuisooqatigiit
• Ataqatigiissaarisup sanaartorfimmi najuunnera 
• isumannaallisaanermut peqqissutsimullu pilersaarut 

1. Ataqatigiissaarisumik toqqaaneq

Sanaartortitsisup akisussaaffigaa qulakkiissallugu – sanaartorfissaq pilersinneqarpat – ataqatigiissaarisumik toqqaasoqassaaq sanaartornermi isumannaallisaanermik peqqissutsimillu ataqatigiissaarisussamik. Ataqatigiissaarisoq taamaalilluni sanaartorfiup ilusilersornerani ass. quit inissititernerini, imaluunniit sanaartorfimmmi sulineq soorlu ass. assaaneq aallartinneqarpat kingusinnerpaamik toqqaassaaq.

Sanaartortitsisup akisussaaffigaa inuk imaluunniit inuit ataqatigiissaarinermut toqqarneqartut inatsisitigut pisussaaffilimmik pikkoriffeqassasut. Tamanna aamma atuuppoq sanaartortitsisup ataqatigiissaarinermi suliat allanut tunniussimappagit. Sanaartortitsisoq imminut ataqatigiissaarisutut toqqarsinnaavoq, sanaartortitsoq inatsisitigut pisussaaffilimmik pikkoriffeqaruni.

Sanaartortitsisoq ataqatigiissaarisut aamma suliaasa amerlassusaannik aalajangersaassaaq. Sanaartortitsisup ataqatigiissaarisut arlallit toqqarpagit, sanaartornermut atatillugu immikkoortut imaluunniit attuumassuteqarfiit isumannaallisaanermut aamma peqqissutsimut atatillugu ataqatigiissaarneqassasut qulakkeernissai akisussaaffigai. 

Sanaartornerup nalaani isumannaallisaanermut peqqissutsimullu pilersaarummi allaqqassaaq kikkut ataqatigiissaarisuunersut aamma suliassaqarfiit sorliit akisussaaffeqarfigineraat.

2. Ataqatigiissaarisup piginnaasai

Sanaartortitsisup akisusaaffigaa qulakkiissallugu:

• Inuk imaluunniit inuit ataqatigiissaarinermut toqqarneqartut minnerpaamik inatsisitigut pisussaaffilimmik pikkoriffeqassasut.

Ima paasillugu, ataqatigiissaarisoq:

• Illuliorfiusumi- aamma sanaartorfiusumi isumannaallisaanermut immikkut paasisimasaqassasoq aamma sananermik ingerlatsisunut ilisimaarinnittuuussaaq.
• Illuliorfinni- aamma sanaartorfinni isumannaallisaanermut aamma peqqissutsimut tunngasunik pingaarutilinnik ilisimasaqassasoq.
• Illuliorfimmi- aamma sanaartorfimmi aqutsinermik sulinikkut misilittagaqassasoq. Ass. suliniummik aqutsisutut, -sanaartornermut aqutsisutut, illuliornermi aqutsisutut imaluunniit sanaartorfinni angikannersuni ataqatigiissaarisutut misilittagalik.
• Illuliorfinni- aamma sanaartorfinni isumannaallisaanermut peqqissutsimullu ataqatigiissaarisut sullivimmi avatangiisit pillugit ilinniakkamik naammassinnissimassapput. Ataqatigiissaarisut, 15. juli 2013 sioqqullugu isumannaallisaanermi sinniisuutitatut sulisunillu siulersuisutut sullivinni avatangiisit pillugit ilinniagaqarsimasut aamma isumannaallisaaqatigiinnut ilaasortaasut, illuliortiternermi sanaartornermilu sulisorisat isumannaatsuunissaannik peqqissuunissaannillu sulianut ataqatigiissaarisutut sullivinni avatangiisit pillugit ilinniartitaanermut ilaassanngillat. Aamma ilinniartitaanermut tassunga ilaassanngillat ataqatigiissaarisut Danmarkimi illuliortiternermi sanaartornermilu sulisorisat isumannaatsuunissaannik peqqissuunissaannillu sulianut ataqatigiissaarisutut sullivinni avatangiisit pillugit ilinniagaqarsimasut, tak. sanatitsisup pisussaaffii pillugit nalunaarut imaluunniit Danmarkimi sullivinni avatangiisit pillugit ilinniartaaneq imaluunniit isumannaallisaanerup peqqissuunissallu suleqatigiissutiginissaat pillugu nalunaarummi nr. 1181, 15. oktober 2010-meersumi § 44 malillugu ilinniartitaaneq.

Sanaartortitsisup – illuliorfissap- imaluunniit sanaartugassap nalinginnaasup annertussusaa ajornassusaalu – eqqarsaatigissavaa, ataqatigiissaarisup piginnaasaanut misilittagaanullu annerusumik piumasaqaateqartoqassanersoq.

Ataqatigiissaarisut ataasiakkaat piginnaasatigut piumasaqaatit tamaasa naammassisimassavaat. Piginnaasat taamaalillutik inunni amerlasuuni agguataarneqassanngillat. Ass. illuliassatut- aamma sanaartugassatut suliniutinut sanaartorneqartunut ataqatigiissaarisup inunnit allanit immikkut ilisimasalinnit aamma misilittagalinnit atuisinnaanera tamatumuuna mattunneqanngilaq.

3. Sanaartortitsisup sanaartornerup nalaani ataqatigiissaarinissaq akisussaaffigaa

Sanaartortitsisup akisusaaffigaa qulakkiissallugu:

• Ataqatigiissaarisup isumannaallisaanermik aamma peqqissutsimut tunngasunik sanaartornermi sulianik ataqatigiissaarineq, soorlu sanaartortitsisup akisussaaffiini malittarisassani allaqqasutut.

Ataqatigiissaarisup sanaartortitsisoq sinnerlugu suliani suliarissavai, soorlu sanaartornerup ingerlanerani ataqatigiissaarisup suliai sanaartortitsisup aalajangiinerinik tunngaveqartartut. Ataqatigiissaarisoq taamaalilluni sullivimmut avatangiisinut inatsimmut nammineerluni akisussaasuunngilaq.

4. Isumannaallisaanermut peqqissutsimullu pilersaarutip suliarinera

Ataqatigiissaarisoq isumannaallisaanermut aamma peqqissutsimut pilersaarummik suliaqassaaq. Pilersaarutip ilaatigut piffissamut pilersaarut imarissavaa, sanaartorfinni suliffeqarfiit ataasiakkaat taamaalillutik suliatik isumannaallisaanikkut- aamma peqqissutsikkullu illersorneqarsinnaasumik pilersaarusiorsinnaavaat, aaqqissuullugit suliaralugillu.

Piffissamut pilersaarut sanaartortitsisup ataqatigiissaarisuanik suliarineqassaaq aamma sanaartugassami suliassat assigiinngitsut aamma suleriaaseqarnerit sivisussusaat eqqarsaatigineqassasut.

Sanaartortitsisoq aaqqissuussineq aqqutigalugu, tassunga ilanngullugu pilersaarutip suliarinerani nutarterneranilu qulakkiigassat eqqarsaatigissavai:

• Sanaartorfimmi immikkut ulorianartut aamma ass. nunamik mingutitsineq asbestilu suussusersinissai, misissornissai, naliliiffiginissai aamma nalunaarsornissai kiisalu pisariaqarpat pinngitsoortissinnaallugu.
• Ikkussukkat pioreersut ass. gassit aqqutaat aamma ledningit spændingillit suussusersineqassasut nakkutigineqarlutik kiisalu isumannaarneqarlutik nalunaaqutserneqarlutillu.
• Teknikikkut ikkussukkat pisariaqartut ass. innaallagiaq, imeq, kuuffiit aamma qulliit sumiissusersiutit eqqortumik ikkussuunneqassasut, kiisalu piffissami sanaartorfiusumi taakkuninnga pisariaqartitsineq malillugu nakkutigineqassasut aserfallatsaalineqarlutillu.
• Sanaartorfiusumi angallannerup qanoq ilisukkulluunniit isumannaalluinnartumik pisinnaanissaa, aamma aqqusernit angalaarfiusussat pisariaqarneratut qaammaqqusersugaanissaat. Tamanna ilaatigut isumaqarpoq, silap pissusaa eqqarsaatigalugu ingerlaarfissat aamma aqqutit pilersinneqassasut, aamma ajornanngippat imminnit avissaaqqassallutik. Aqqusernit ass. lastbiilinut assigisaannullu, mobilkraninut angallassissutinullu allanut assakaasui annertuumik naqitsinilinnut ingerlaarfiit ingerlaartunullu ajornanngippat aqqusineq ataatsip tungaannaanut ingerlaviussaaq.
• Sanaartorfimmi sulisut teknikikkut ikorfartuutit naleqquttut pisariaqarpat atussavaat, tassunga ilanngullugu sanaartornermi atortutnik assartuinermi ikkussuinermilu.
• Atortussat inissiivissamut naleqquttumut inissinneqarsinnaanissasut aammalu patajaatsumik allequtaqartinnissasut.
• Immikkoortut sulianik immikkut ulorianaatilinnik ingerlassiffiusussat ajornanngippat allanut suliaqarfiutinnaveersaarnissaat imaluunniit angallaffiunaveersaartinnissaat. Tamanna ass. sulinermi nipiliorfiusumi aamma pujoralattumi, inummut illersuutinut soorlu anersaartornermut illersuutinut, aamma qaartiterinermut, immikkoortunik ikkussuinermut aamma isaterinermut aamma atuuppoq.
• Ikkussukkat, isumannaallisaatit immaqalu ulorianaateqarsinnaasut ingerlaavartumik nakkutigineqarnissaannut periutsimik aalajangersaasoqassasoq. Ass. sanaartornermi innaallagialersuinerit, qulliit sumiissusersiutit, stilladsit, ungallut, iikkat savimmernit, qimaaffissiat, ikuallattoornermi- aamma ikiueqqaarnermi atortut kiisalu ukiaanerani suliaasartut misissorneri.
• Upalungaarsimanissamut-, qimarngussinermi-, aamma sungiusarnissamut pilersaarutit ataqatigiissinneqassasut, pisariaqartutut nalilerneqarpat. Ass. ineeqqani nerukitsuni, pissutsini tikikkuminaatsuni, kissartorujussuarmi sulineq imaluunniit ikuallattoqarnissamut, qaartoqarnissaanut imaluunniit qarsutsinissamut aarlerinartuni sulinermut atatillugu tamanna pisinnaavoq.

5. Sanaartornerup ingerlaneranut atatillugu killeqartitsineq

Sanaartortitsisup akisusaaffigaa qulakkiissallugu:

• Sanaartorfinni sulisitsisunik isumaqatigiissusiortoqassasoq immikkoortut ataatsimoorfiit annertussusaat akisussaaffillu pillugit aamma ataatsimut isumannaallisaanermi iliuusissaliortoqassasoq.

Sanaartortitsisoq – sanaartorneq sioqqullugu nalaanilu – ataqatigiissaarisumit ikiorneqarluni sumi aamma qaqugu suliffeqarfiit sanaartorfimmi ataatsikkut suliaqartut amerlanerussanersut erseqqissaassaaq. Tamanna ataatsimoorussanut immikkoortunut suliaqarfinnut aamma angallaffiusunut atuuppoq.

Sanaartortitsisup ataatsimut suliassaqarfinni isumannaallisaanermut atortunik pilersitsinissamut, aserfallatsaaliuinissamut piiaanersamullu kina akisussaasuunersoq sulisitsisut ataasiakkaat peqatigalugit isumaqatigiissusiussaaq. Akisussaaffiup taassuma annertussusaa ersarissumik nassuiarneqarsimassaaq, aamma suliffeqarfik ataaseq kisimi ataatsimut suliassaqarfimmut imaluunniit piffissami tassani ataatsimut isumannaallisaanermut iliuutsinut aalajangersimasunut akisussaasuussaaq.

Ataatsimut suliaqarfiusunut aamma ataatsimut isumannaallisaanermi iliuutsinut atatillugu sanaartortitsisup killeqartitsinera tassunga ilanngullugu torersuutitsinissamut, aqqusinermi sulianik nalunaaqutsiinermut, aputaajaanermut, siorarterinermut aamma ataatsimut ilorrisimaarnissamut iliuusaasinnaasunut ilaatigut akisussaaffeqarneq isumannaallisaanermut aamma peqqissutsimut pilersaarumi allaqqassaaq. Pilersaarut ingerlaavartumik nutaarterneqassaaq, allannguuteqarpat – ass. sanaartorfimmi sulisitsisut akornanni ataatsimut iliuuserineqartunut akisussaasuuneq.

6. Sanaartornerup nalaani ataqatigiissaarineq

Sanaartortitsisup akisussaaffigaa qulakkiissallugu, ataqatigiissaarisoq sanaartornermi ingerlaavartumik aamma pisariaqartillugu isumannaallisaanermut aamma peqqissutsimut pilersaarummik, tassunga ilanngullugu aaqqissuussaanermut pilersaatut, sanaartorfiup titartarnera sanaartornerup naammassiartuaarnerani allannguisoqarsinnaaneranilu piffissamut pilersaarummik nutarterisassasoq.

Ataqatigiissaarineq aallartinneqassaaq sanaartorfik pilersinneqarpat. Ima paasillugu sanaartorfiup ilusilersornerani ass. aqqusernit angalaarfissat pilersinnerini, quit inissititernerini, imaluunniit sanaartorfimmmi sulineq soorlu ass. assaaneq aallartinneqarpat kingusinnerpaamik toqqaassaaq.

6.1. Isumannaallisaanermut peqqissutsimullu pilersaarutip nutarternera

Isumannaallisaanermut aamma peqqissutsimut pilersaarut sanaartornerup ingerlanerani ataqatigiissaarinermut qitiusumik tunngavigineqarpoq aamma ataqatigiissaarisumik ingerlaavartumik nutarterneqassalluni.

Ilaatigut pingaaruteqarpoq, aaqqissuussaanermut pilersaarut ingerlaavartumik nutarterneqarnissaa, taamaalilluni sanaartortitsisup aamma ataqatigiissaarisup tamakkiisumik takusinnaassavaa sanaartorfimmi suliaqarnersut aamma taamaattumik ataqatigiissaarisup ataqatigiissaarinermini ilaatissallugit. Tamanna aamma sanaartorfimmi sanaartornermi peqataasunut (entreprisit) namminneq sulialinnut atatillugu.

Aammattaaq immikkoortuni ataatsimoorussani aamma ataatsimut suliniutaasuni akisussaaffinnik agguaassinermi allannguutit tamarmik ingerlaavartumik nutarterneqassapput apeqqutaanani isumaqatigiissutit sanaartortitsisup aamma suliffeqarfiit akornanni imaluunniit sanaartorfimmi suliffeqarfiit akornanni toqqaannartumik isumaqatigiissutigineqarsimanersut.

Isumannaallisaanermut aamma peqqissutsimut pilersaarut piffissami sanaartorfiusumi tamarmi sanaartorfimmi sulisunut aamma sulisitsisunut tamanut pissarsiarineqarsinnaassaaq.

6.2. Suliat allat

Sanaartornerup ingerlanerani sanaartorfimmi sulisitsisut akornanni suleqatigiinneq aaqqissuutissallugu suliassaraa – tassunga ilanngullugu sulisitsisut sanaartorfimmi imminnut malittut. Taamaattumik ataqatigiissaarisup sanaartornerup ingerlanerani suliassai ilaatigut ukuupput:

• Minnerpaamik ullut 14-ikkaarlugit suliffeqarfinnut tamanut aamma sanaartorfimmi sullivinni avatangiisinut tunngasunik suliaqartunut isumannaallisaaneq pillugu ataatsimiititsisarnissaq.

7. Isumannaallisaanermi ataatsimiinnerit

Sanaartortitsisup akisusaaffigaa qulakkiissallugu:

• Ataqatigiissaarisoq minnerpaamik ullut 14-ikkaarlugit suliffeqarfinnut tamanut aamma sanaartorfimmi sullivinni avatangiisinut tunngasunik suliaqartunut isumannaallisaaneq pillugu ataatsimiititsisassaaq.

Sanaartortitsisup akisussaaffigaa qulakkiissallugu, ataqatigiissaarisup suliffeqarfiit sanaartorfimmi suliaqartut tamaasa, apeqqutaatinnagu qanoq sulisoqartiginersut – tassunga ilanngullugu sanaartornermi peqataasut, sanaartorfimmi nammineq suliaqartut (entreprisit)) – ullut 14.-ikkaarlugit isumannaallisaaneq pillugu ileqquusumik ataatsimiinnissamut aggersassallugit.

Ataqatigiissaarisup sulisitsisoq imaluunniit sinniisaasoq – sanaartorfimmi nalinginnaasumik suliffeqarfimmi sulinermut aqutsisoq – isumannaallisaaneq pillugu ataatsimiinnernut ataatsimiigiaqqusassavaa. Taassuma saniatigut suliffeqarfiit sanaartorfimmi sullivimmi avatangiisit pillugit aaqqissussaat ataatsimiinnermi peqataasassapput.

Sanaartornerup aallartinneranit isumannaallisaaneq pillugu ataatsimiinnerit ingerlanneqartarput, sanaartorfimmi suliap naammassinissaata tungaanut, pilersaarut sanaartukkanut angisuunut malittarisassanut ilaappat. Aallartisarnermi sanaartorfimmi suliffeqarfik ataasiinnaagaluarpat aamma tamanna atuuppoq.

Isumannaallisaaneq pillugu ataatsimiinnerit siunissamut aamma isumannaallisaanikkut iliuusissanut tunngasariaqarput, piffissami aggersumi ataatsimut suliaqarfinni aalajangiiffigineqartussat. Ass. sanaartorfimmi ineqarfiit inissititserneri pillugit apeqqutit imaluunniit sulinermut atatillugu ajornartorsiutit, ass. nipimik pujoralammilluunniit akornusersorneqarnissamut aarlerinartoqartillugu. Tamanna aamma ass. ajutoortunut qanittumiitsillugu aamma isumannaallisaanermi ajortoqartillugu, isumannaallisaaneq pillugu ataatsimiinneq sioqqullugu pisimasuni pissutsit ajornartorsiutillu eqqartornissaannut atuuppoq.

Sanaartortitsisup akisussaaffigaa isumaallisaaneq pillugu ataatsimiinnerni isumannaallisaanermut aamma peqqissutsimut pilersaarutip malinneqarnissaa, taamaalilluni eqqartuinermut tunngavittut ilaassammat.

Isumannaallisaaneq pillugu ataatsimiinnerit ataqatigiissaarisup aqussagai imaqarniliussasorlu sanaartortitsisup akisussaaffigaa qulakkiissallugu. Imaqarniliaq nalinginaasumik ajornartorsiutit ataatsimiinnermi eqqartorneqartut pillugit paasussutissanik imaqassaaq, ajornartorsiutit ataasiakkaat kia aaqqiiviginissai akisussaaffigineraa, qaqugukkut ajornartorsiutit aaqqiivigineqassanersut. Piffissami aggersumi ataatsimiinnermi aalajangerneqartumi sanaartorfissaq pillugu suleqatigiinnissamut aalajangiinerit pillugit imaqarniliaq aamma imaqassaaq. Imaqarniliaq ataatsimiinnermi peqataasunut, sanaartortitsisumut, suliffimmi aqutsisunut tamanut, sullivimmi avatangiisit pillugit aaqqissuussanut, suliffeqarfinnut sanaartorfimmi suliaqartunut tamanut kiisalu sanaartorfimmi sulisut sinniisaannut nassiunneqassaaq.

Pisariaqartitsineq malillugu isumannaallisaaneq pillugu immikkut ataatsimiittoqartassaaq. Ass. sakkortuumik ajutoortoqarpat imaluunniit ajutoorneq sakkortuumik ajutoornermik kinguneqarsinnaasoq.

8. Isumannaallisaaneq pillugu siunnersuisooqatigiit

Angisuumik illuliorneq-sanaartorneq inunnik 100-nik sulisoqarfiusoq piffissamilu minnerpaamik sapaatip akunnerani sisamani, sanaartorfimmi isumannaallisaaneq pillugu siunnersuisooqatigiit pilersinneqarsinnaapput. Malittarisassat atuuttarput, Sullivinnik Nakkutilliivimmit naliliisoqarsimanngippat, sanaartorfinni isumannaallisaanermi sulineq isumannaallisaaneq pillugu ataatsimiinnerni nalinginnaasuni ataqatigiissaarneqassasoq, sulisut aamma isumannaallisaanermi sinniisut tamarmik illuliorfimmi-/sanaartorfimmi peqataaffigisaanni.

Isumannaallisaaneq pillugu siunnersuisooqatigiinniipput ataqatigiissaarisoq, sanaartorfimmi isumannaallisaanermi sinniisut marluk, sanaartorfimmi sulisitsisut sinniisaat ataaseq aamma sanaartorfimmi sulianut aqutsisut sinniisaat ataaseq. Ataqatigiissaarisoq isumannaallisaaneq pillugu siunnersuisooqatigiinnut siulittaasutut atuutissaaq.

Isumannaallisaaneq pillugu siunnersuisooqatigiit isumannaallisaaneq pillugu ataatsimiinnerni suliarineqartartut suliarisarpaat isumagisarlugillu.

Isumannaallisaaneq pillugu siunnersuisooqatigiit isumannaallisaaneq pillugu ataatsimiinnermisut ataatsimiigiaqqusinermi, ataatsimiinnerit akulikissusaat aamma imaqarniliamut tunngatillugu malitarisassat malillugit ataatsimiittarput.

Isumannaallisaaneq pillugu siunnersuisooqatigiit tamatuma saniatigut isumannaallisaanermi gruppit sanaartorfinni sinniisuuffigineqartut tamaasa minnerpaamik kvartalimut ataasiartumik ataatsimeeqatigineqartassapput.

9. Ataqatigiissaarisup sanaartorfimmi najuunnera attaveqarneralu

Sanaartortitsisup akisusaaffigaa qulakkiissallugu:

• Ataqatigiissaarisoq sanaartorfimmi ataavartumik najuuttassasoq.

Sanaartortitsisoq tassaavoq, ataqatigiissaarisup qanoq annertutigisumik sanaartorfimmiinnissaanik aalajangersaasartoq, illuliornerup- imaluunniit sanaartukkap aningissusaa pisariuneralu, sullivimmi avatangiisit piviusut kiisalu suliffeqarfiit amerlassusaat aamma sanaartorfimmi sulisut ilaatigut tunngavigalugit.

10. Isumannaallisaanermut peqqissutsimullu pilersaarut

Sanaartortitsisup akisusaaffigaa qulakkiissallugu:

• Ataqatigiissaarisup isumannaatsuunissamut peqqissutsimullu pilersaarusiussasoq.

Isumannaallisaanermut aamma peqqinnissamut pilersaarut illuliorfimmi- imaluunniit sanaartorfimmi suliap aallartinnerani piareereersimassaaq. Pilersaarut tamatuma kingorna sanaartornerup ingerlanera tamaat ingerlaavartumik malinneqassaaq.

Pilersaarut sanaartorfimmi sulisoqarnerani piffissami tamarmi sulisunut sulisitsisunullu pissarsiarineqarsinnaassaaq.

Pissarsiarineqarnissaanut piumasaqaammi piumasarineqarpoq, pilersaarut tamakkiisuussasoq, taamaalillunni tamakkiisumik takunnissinnaatitsissalluni paasiuminartuussallunilu. Pilersaarut ass. ringbindimi katersorneqassaaq imaluunniit mappemi ataatsimoorussami elektroniskinngorlugu suliarineqassaaq.