Sanaartortitsisup akisussaaffii - kina, sumi, qanga

Ilitsersuummi taaguutit sanaartortitsisoq, illuliornermi- aamma sanaartornermilu sulisoq kiisalu sanaartorfik nassuiarneqarput aamma taamaalilluni sumi qaqugukkullu isumannaallisaanermut aamma peqqissutsimut sanaartortitsisup pilersaarusiornissaa aamma ataqatigiissaarinissaalu atuunnersut. Ilitsersuut aamma sanaartortitsisut tamakkiisumik pisussaaffiinik naatsumik nassuiaammik imaqarpoq.

1. Kinaana sanaartortitsisoq?

Sanaartortitsisoq inuuvoq imaluunniit inatsisitigut akisussaasoq, illuliornermi- aamma sanaartornermi sulianik pilersaarusiortitsisoq aamma naammassinnissamut akiliisoq. Ass. inuit ataasiakkaat imaluunniit inuit ataasiakkaat suliffiutaat, ingerlatseqatigiiffiit, paaqqinnittarfiit pisortanit pigineqartut aamma namminersortut kiisalu aaqqissuussat peqatigiiffiillu.

Sanaartugassanik suliaqartoq, nammineq akilikkaminik tuniniagassaminik illuliortoq, sanaartortitsisutut taamaalilluni isigineqartarpoq - naak illumik pisisusaq illup atuuffissaanut- imaluunniit ilusissaanut piumasaqaateqartuugaluartoq.

Tamanna aamma attartornikkut aqunneqartunut sanaartukkanut atuuppoq. Tassani illumik piginnittoq (attartortoq) - ass. pensionskasse imaluunniit inissiaatileqatigiiffik - sanaartortitsisoq apeqqutaanani attartortoq illumut naammassineqarsimasumut piumasaqaateqarsimanersoq.

2. Sumi sanaartortitsisup akisussaaffia pillugu inatsit atuuppa?

Isumannaallisaanerup pilersaarusiornissaanut aamma ataqatigiissarnissaanut sanaartortitsisup akisussaaffia pillugu malittarisassat illuliornissamut- aamma sanaartortitsinissamut aamma sulianut allanut illuliorfimmi- imaluunniit sanaartorfimmi atuuppoq.

Illuliornermik sanaartornermillu suliat

Illuliornermik sanaartornermillu sulianut ilaapput:

1. Illuliornermut aamma allanngortiterinermut atatillugu suliat aamma sananeqaatit, tassunga ilanngullugu ikkussuilluni sulineq.
2. Aqqusernit, sullorsuit, ikaartarfiit, umiarsualiviit sanaartukkallu assingusut sananerinut allanngortinnerinullu atatillugu suliat.
3. Sulianut immikkoortoq 1 aamma 2-mi sulianut atatillugu nunamik assaanerit.
4. Ruujorit aamma kabelilersuineq.
5. Immikkoortut 1-4 pillugit iluarsartuussinerit- aamma aserfallatsaaliuinerit.
6. Sulianik immikkoortoq 1-4-mi ilaasunik tamakkiisumik imaluunniit ilaannakuusumik isaterineq ingutserineq.

Taamaalilluni piumasaqaatinut ilaapput sananeqaatinik sananeq, allanngortiterineq, iluarsaassineq aamma isaterineq. Sananeqaatit illup iluaniissinnaapput imaluunniit silamiissinnaapput. Sananeqaatit ataasiakkaajusinnaapput ass. isiginnaartarfik imaluunniit tupeq imaluunniit illup ilaanut atajuartussaq imaluunniit sanaartugaq ass. aalajangersimasumik atasut imaluunniit betonit-imaluunniit sananeqaatit savimmernit, saqqummiiviit, saqqummersitsiviit imaluunniit suliaqarfittut atortussat sananeqaatitut pilersitaagallartut. Sananeqaatit tunisassiorfinnut assingisaannullu aamma ilaasinnaapput. Sananeqaatit naammassereersumi maskiinami CE-mik ilisarnaatilimmmi ilaapput, sanaartortitsisup akisussaaffianut atatillugu sananeqaatitut isigineqanngillat.

Sanaartorfik

Sanaartorfik tassaavoq immikkoortoq illuliorfik- imaluunniit sanaartorfik soorlu ass. illuliorfik, ikaartarfinnik aserfallatsaaliuineq, sananeqaatinik pilersitsineq aamma tamanut aqqutini ruujorinik assaaneq.

Immikkoortumi sanaartorfimmi illuliorfiit- imaluunniit sanaartorfiit inissiivittallit, quit- aamma containereqarfiit kiisalu illuliorfinniút- aamma sanaartorfinnut isaaffiit- aamma aqqusernit assartuiffiit il.il.

Sanaartortitsisup aalajangersinnaavaa, suna illuliorfissaanersoq- imaluunniit sanaartorfissaanersoq.

Sanaartortitsisup akisussaaffia pillugu malittarisassat.

Sanaartortitsisup taassuma illuliornerit- imaluunniit sanaartornerit arlallit sumiiffimmi ataatsimi imaluunniit tulleriitsiinnarlugit suliarippagit, suliallu akornanni ersarissumik killeqanngippat, sanaartorfik ataaseq pineqarpoq. Sanaartorfiit arlaallit pineqartarput, sanaartorfinni suliat immikkoorluinnarpata, aamma sanaartorfiit imminnut assiaquteqarnerat takuneqarsinnaappat.

3. Sanaartortitsisup akisussaaffia pillugu inatsit qaqugukkut atuuppa?

Isumannaallisaaneq peqqissuserlu pilersaarusiornissaannut ataqatigiinnissaannullu sanaartortitsisup akisussaaffia pillugu malittarisassat atuutissapput naatsorsuutigineqarpat, minnerpaamik suliffeqarfiit marluk ataatsimoorluik inuit 11-it ataatsikkut illuliorfimmi- imaluunniit sanaartorfimmi sulitikkat.

Suliffeqarfiit aamma inuit qassit illuliorfimmi- imaluunniit sanaartorfimmi sulerusunnersut naliliinissamut tamanna pingaaruteqarpoq, qanoq illuliorfik- imaluunniit sanaartorfik aalajangersimasoq neqerooruteqarfigineqarsimanersoq - tassunga ilanngullugu sanaartorfimmi suliat ingerlaavartut imaluunniit arlariit pineqarnersut. Sanaartortitsisoq, illumik isaterinissamik aamma sumiiffimmi tassani illumik nutaamik sananissamik kissaatilik isaterinissamut atatillugu taamaalilluni pisussaaffeqanngilaq, tamanna suliffeqarfimmmit ataatsimit ingerlanneqarpat, aamma kingornatigut illumik nutaamik sanaartornissaq sanaartukkatut immikkoortutut neqeroorutigineqarpat.

4. Sanaartortitsisut akisussaaffiinut suut ilaappat?

Sanaartortitsisup akisussaaffii pillugit malittarisassani pingaartumik pineqarput, ataqatigiissaarisumik isumannaallisaanermut aamma peqqissutsimut ataqatigiissaarisussamik toqqaasoqarnissaa, ataatsimut iliuusissanut akisussaassuseq pillugu isumaqatigiissusiortoqassasoq aamma illuliorfimmi- aamma sanaartorfimmi isumannaallisaaneq il.il. ataatsimiittoqartassasoq. Sanaartornerup nalaani sanaartortitsisup ataqatigiissaarisua illuliorfimmi- imaluunniit sanaartorfimmi isumannaallisaanermik aamma peqqissutsimut tunngasunik aamma sulianik allanik ass. atortunik assartuinermi, eqqiluisaarnermi, sanaartornermik aqutsinermi kiisalu allaffissornermi aamma titartaalluni sulinermi. ataqatigiissaarissaaq.

Sanaartortitsisoq illuliorfimmi- imaluuniit sanaartorfimmi sulisut isumannaatsuunissaannut peqqissusaannullu toqqaannartumik akisussaanngilaq - sanaartortitsisoq ilutigalugu sulititsisuunngippat. Pilersaarusiornermi aamma sanaartornerup ingerlanerani isumannaallisaanermut aamma peqqissutsimut tunngasunik pilersaarusiorneq ataqatigiissaarinerlu aqqutigalugit sanaartortitsisup akisussaanermini illuliorfimmi- imaluunniit sanaartorfimmi sulisitsisut isumannaarsumik- aamma peqqissutsikkut illersorneqarsinnaasumik pilersaarusiortoqarnissaa, aaqqissuussisoqarnissaa aamma sulisoqarnissaa qulakkiissavaa.

Sanaartortitsisup sanaartortitsisutut akisussaaffik malillugu suliassat allanut suliaritissinnaavai, kisianni sanaartortitsisoq inatsisitigut akisussaaffimmik allanut tunniussisinnaanngilaq.

Minnerpaamik suliffeqarfiit marluk aamma inuit 11-it

Malittarisassat atuutissapput, naatsorsuutigineqarpat minnerpaamik suliffeqarfiit marluk ataatsimoorlutik inuit 11-it ataatsikkut illuliorfimmi- imaluunniit sanaartorfimmi sulitikkaat.