Spring over venstremenu

Kalaallit Nunaanni sullivinnik nalilersuinerit pillugit nalunaarut

Sullivinnik Nakkutilliisorqarfik - Nal. nr. 1168 Nutsernera - 8. oktoberi 2007

Kalaallit Nunaanni sullivinni avatangiisit pillugit inatsimmi, tak. Inatsimmik nalunaarut nr. 1048, 26. oktober 2005-imeersoq, § 11 a, § 56 aamma § 67 naapertorlugit aalajangersarneqarput:

Kapitali 1 - Atuuffii

§ 1. Nalunaarut atuutissaaq sulisitsisumi sulinernut, tak. Kalaallit Nunaanni sullivinni avatangiisit pillugit inatsimmi §§ 2-3 a.

Imm. 2. Nalunaarut atuutsinneqassanngilaq,

  1. sulisitsisup namminerisatut angerlarsimaffiani sulinermi, aamma
  2. sulineq, sulisitsisup ilaqutaani, illumi inoqutigiinnut ilaasunit taamaallaat ingerlanneqartoq.

Kapitali 2 - Sullivinnik nalilersuineq

§ 2. Suliffeqarfimmi isumannaallisaanermut peqqissutsimullu pissutsinik allakkatigut sullivimmik nalilersuinermik suliaqartoqarnissaanik sulisitsisoq isumaginnissaaq, ingammik sullivinnik nalilersuinermik ersarinnerusumik pilersaarusiornermut, aaqqissuussinermut suliamillu naammassinninnermut atatillugu allakkatigut suliamik isumaginneriaatsip isumannaarnissaa siunertarineqarluni, aammalu tamatuma inernerisaata takusassiarineqarnissaa isumannaarneqassalluni, § 3, imm. 5 inn. Sullivinnik nalilersuinerit qarasaasiami ilusilikkatut suliarineqarsinnaapput.

Imm. 2. Sullivinni pissutsit tamaasa sullivinnik nalilersuinermut ilanngunneqarnissaat isumannaarniarlugit sullivimmi isumannaallisaaniaqatigiit sullivimmik nalilersuinermi pilersaarusiornermut, aaqqissuussinermut, suliamik naammassinninnermut malitseqartitsinermullu tunngasutigut ilanngunneqarlutillu aqqusaagassani tamani peqataatinneqarnissaannik sulisitsisuusoq isumaginnissaaq. Sullivimmik nalilersuinermut uppernarsaammik atsiuisoqarneratigut isumannaallisaaniaqatigiit ilanngunneqarsimanerinik isumannaallisaaniaqatigiit tungaannit uppernarsaateqartoqassaaq.

Imm. 3. Sullivinni isumannaalisaaniaqatigiinnik pilersitsivigisassaanngitsuni sulisuusut assingusumik sullivimmik nalilersuinermi ilanngunneqassapput, tak. imm. 2.

§ 3. Sullivimmik nalilersuineq suliap suunera, teknikkikkut atortorissaarutit, akuutissat atortullu, suliffimmi suleriaatsit suliamilu aqqusaartakkat, suliffigisap aaqqissugaanera, kiisalu suliffiusup angissusaa aaqqissuunneqarneralu sianigalugit suliarineqassaaq.

Imm. 2. Ilanngussaq 1-imi pinaveersaartitsinermik tunngaviit nalunaarneqartut najoqqutaralugit sullivimmik nalilersuineq sullivimmi avatangiisini ajornartorsiutinut sullivimmiittunut isummersuummik qanorlu aaqqiivigineqarnissaannik imaqassaaq. Pisariaqartinneqartutut aaqqiissutissat sullivimmik nalilersuinermut nalunaarneqassapput.

Imm. 3. Periutsimik sorlermik atugaqarluni sullivimmik nalilersuinermik suliaqartoqassanera sulisitsisup nammineq toqqarsinnaavaa. Taamaattorli periutsimi toqqakkami nalilersuinerup makkuninnga imaqartinnissaa isumannaarneqassaaq:

  1. Suliffiup sullivimmi avatangiisaani pissutsinik suussusersillunilu erseqqissaaneq, tassunga ilanngullugu sulliviup avatangiisaani ajornartorsiuteqarnersoq, kiisalu ajornartorsiutit suussisii annertussusaallu.
  2. Aaqqiissutissat pisariaqartitat aallarnisarnissaannut suliffiup sullivimmi avatangiisiini ajornartorsiutaasut nassuiarneri nalilernerilu, tassunga ilanngullugit ajornartorsiutit suussusii, pingaaruteqassusii annertussusiilu, kiisalu ajornartorsiutinut patsisaasut.
  3. Suliffiup sullivimmi avatangiisiini ajornartorsiutaasut imaaliallaannaq aaqqiivigineqarsinnaanngitsut aaqqiiviginissaannut periusissatut pilersaarutip tulleriiaarfiginera inissitsiterneralu. Ajornartorsiutit paasineqartut aaqqiivigineqarnissaannut qanoq tulleriiaarlugillu qanoq akulikissuseqarnissaat pilersaarummi allassimassaaq.
  4. Periusissatut pilersaarummik qanoq malitseqartitsinissamut malittarisassat, tassunga ilanngullugu pilersaarutip piviusunngortinnissaanut kia akisussaassuseqarnera, kiisalu periusissanik aallarnikkanik nakkutiginninnermik misissuinermillu qaqugukkut qanorlu pisoqartarnissaa, kiisalu aaqqiissutissatut aallartinneqartut naammanneri, periusissatullu pilersaarut iluarseqqittariaqarnersoq il.il.

Imm. 4. Suliffiup sullivimmi avatangiisaanut pingaaruteqartunik sulinermi, suleriaatsini sulinermilu aqqusaartakkani il.il. allannguuteqartoqarneratigut sullivimmik nalilersuineq naleqqussarneqassaaq, taamaattorli kingusinnerpaamik ukiut pingasukkaarlugit.

Imm. 5. Sullivimmik nalilersuineq suliffeqarfimmi pigineqassaaq, suliffeqarfimmi pisortanit, sulinermik siulersuisunit, sulisuusunit allanit aammalu Sullivinnik Nakkutilliisoqarfimmit atugarineqarsinnaassalluni.

Imm. 6. Sullivinni avatangiisinut inatsit naapertorlugu immikkut ittunik aalajangersimasunik malittarisassaqartinnagu sullivimmik nalilersuineq Sullivinnik Nakkutilliisoqarfimmut nassiunneqaraniluunniit akuerineqassanngilaq.

§ 4. Sullivimmi nalilersuinermik suliaqarnissaminut sulisitsisoq pisariaqartitamik nammineq ilisimasaqanngippat sulisitsisoq immikkut ilisimasalimmik tamatuminnga isumaginnissinnaasumik pissarsiussaaq.

Imm. 2. Naak immikkut ilisimasalimmit ikiorserneqartoqaraluartoq sullivimmik nalilersuinermik suliaqartoqarnissaanut, aammalu § 2-mi aamma § 3, imm. 1-5-imi piumasaqaataasut naammassineqarnissaannut sulisitsisoq akisussaassuuvoq.

Kapitali 3 - Immikkut akuersisarneq naammagittaalliorsinnaanerlu

§ 5. Sullivinnik Nakkutilliisoqarfimmi pisortap, immikkut ittunik pisussaqartillugu, akuerisaarsinnaavaa nalunaarummi matumani aalajangersakkanik saneqqutsinissaq tamanna naammaginarlunilu isumannaalluinnartutut isumaqarfiginartillugu.

§ 6. Nalunaarut manna malillugu aalajangiinerit Kalaallit Nunaanni sullivinni avatangiisit pillugit inatsimmi § 64 malillugu naammagittaalliuutaasinnaapput.

Kapitali 4 - Pinerluttulerinermik inatsisitigut pineqaatissiissutissat

§ 7. Kalaallit Nunaanni pinerluttulerinermik inatsit malillugu pineqaatissiissutissat eqqartuussutaasinnaapput

  1. § 2-mik, § 3, imm. 1-5-imik aamma § 4-mik unioqqutitsisunut,
  2. nalunaarummi aalajangersakkat naapertoulugit peqqussutaasunik malinninngitsoq, imaluunniit
  3. nalunaarut malillugu immikkut akuerineqarnermi atugassarititanik sumiginnaasunut.

Imm. 2. Pineqaatissiissutissat sakkortussusilerniarneranni sakkortusaatitut naatsorsuunneqassaaq,

  1. unioqqutitsinerup piaaraluneernikkut imaluunniit mianersuaalliorujussuarnikkut pisimanera,
  2. unioqqutitsinikkut inuunermik peqqissutsimilluunniit ajoqusiisoqarsimanera tamatumunngaluunniit aarlerinartorsiortitsisoqarsimanera,
  3. pissutsit taama ittunut taakkununngaluunniit assingusunut siussinnerusukkut peqqussuteqartoqareersimanera, imaluunniit
  4. unioqqutitsinikkut pineqartup imminut allanulluunniit aningaasatigut iluanaarutississimanera imaluunniit siunertaralugu iluanaarniarsimanera.

Imm. 3. § 2-mit, § 3, imm. 1-5-imit. § 4-mit. aamma § 7, imm. 1, nr. 2-3-imik, unioqqutitsinermut sulisitsisoq akisussaatitaassaaq, unioqqutitsineq pineqartumut piaaraluneernertut imaluunniit mianersuaalliornertut tutsinneqarsinnaanngikkaluarpalluunniit. Akisussaatitsinissamut patsisissaassaaq unioqqutitsinerup inummut imaluunniit inunnut arlalinnut sullivimmut attuumassutilinnut imaluunniit sullivimmut taamatut ittillugu tutsinneqarsinnaanissaa. Aalajangersagaq manna malillugu akiliisitsinissani atortuutinneqassanngilaq Kalaallit Nunaanni pinerluttulerinermik inatsimmi § 91, imm. 4. Akiliisitsissutissat annertussusilerneranni imm. 1, nr. 2-4, taamatulli atortuutinneqassapput.

Imm. 4. Unioqqutitsinerit allat sinnerlugit inatsisitigut ingerlatsisuusunit, tamatumani aamma ingerlatsivinnit aktie-, anparts- aamma andelsselskabinit, soqutigisaqaqatigiit piginneqatigiiffiinit, peqatigiiffinnit, aningaasaateqarfinnit, pigisanik isumaginnittunik, kommunenit, kommunit peqatigiiffiinit, Kalaallit Nunaanni kommunalbestyrelsit nunaqarfinnilu aqutsisut il.il. pillugit Inatsisartut inatsisaanni § 64-imi pineqartunit unioqqutitsineruppata Namminersornerullutik Oqartussanit aamma naalagaaffimmit unioqqutitsissutaasunit taamaattutut akiliisussanngortitaasinnaapput.

Kapitali 5 - Atuutilernera

§ 8. Nalunaarut atuutilissaaq ulloq 1. januar 2008.

Imm. 2. Sulisitsisunut, isumannaallisaanermik peqqissutsimillu sulinermik aaqqissuussinissamut pisusussaaffeqanngitsunut nalunaarut atuutilissaaq ulloq 1. januar 2009.

Sullivinnik Nakkutilliisoqarfik, ulloq 8. oktoberi 2007

JENS JENSEN/Charlotte Skjoldager

Ilanngussaq 1 - Pinaveersaartitsinermik tunngaviit nalinginnaasut

Sulinermik nalaanni sulisuusut isumannaatsuunerinut peqqissusaannillu pitsanngorsaanermut periutsit tullinnguuttut maluginiagassaapput:

  1. Aarleqqutaasinnaasunik pinaveersaarineq.
  2. Aarleqqutaasinnaasunik pinaveersaarneqarsinnaanngitsunik naliliineq.
  3. Pinngorfiini aarleqqutaasut akiorneqarneri.
  4. Sulinerup inummut naleqqussarnera, ingammik suliffeqarfiup ilusilersorneranut, kiisalu sulinermi atortut toqqartornerinut aammalu sulinermi tunisassiornermilu periutsinut atatillugu, ingammillu sulinernik assigiiaartuusunik aammalu aalajangersimasumik tulleriiaarisunik annikillisaanissaq, aammalu taamatut sulinerup peqqissutsimut sunniutaanik annikillissaanissaq siunertaralugit.
  5. Teknikkikkut ineriartornermik sianiginninneq.
  6. Ulorianartut uloriananngitsunik imaluunniit ulorianannginnerusunik taarsersorneri.
  7. Pinaveersaarinerup ataatsimoortuusutut ataqatigiissutut iluseqartilissallugu pilersaarusiornera, pinaveersaartitsinermiissallutik teknikki, sulinerup aaqqissuunnera, suliffimmi pissutsit, inuit akornanni ataqatigiinerit aammalu sullivimmi avatangiisini atuuttunit sunniuteqaatit.
  8. Inuit ataasiakkaat illersornissaannut periusissat pinnagit inuit tamaasa illersornissaannut periusissanik akuersissutiginissaat.
  9. Sulisuusut naleqquttumik ilitsersorneqarneri.