Sullivimmi avatangiisit pillugit suleqatigiinneq suliffeqarfinni amerlanerpaamik qulingiluanik sulisulinni

At-ilitsersuutit F.3.1 aamma F.3.3-1 qallunaat ilitsersuutigaat qallunaallu sullivimmi avatangiisit pillugit inatsisaannut attuumassuteqarlutik. Taamaakkaluartoq qallunaat At-ilitsersuutaat sullivimmi avatangiisit pitsaasuutinneqarnerannut takussutissaapput, aamma kalaallit sullivimmi avatangiisit pillugit inatsisaannik malinninnissaq eqqarsaatigalugu. Suliffeqarfinni 10-34-nik sulisoqartuni aamma suliffeqarfinni ikinnerpaamik 35-nik sulisoqartuni sullivimmi avatangiisit pillugit suleqatigiinnermut ilitsersuutini piginnaanngorsarnissaq pillugu pilersaarummut aamma tapiliullugu sullivimmi avatangiisit pillugit ilinniartitaanermut piumasaqaatit pineqartut eqqarsaatigisariaqanngillat, taakku kalaallit sullivimmi avatangiisit pillugit inatsisaanni aamma Kalaallit Nunaanni sullivinni isumannaallisaaneq peqqissuunissarlu pillugit suleqatigiinneq pillugu nalunaarummi piumasaqaataanngimmata.

At-ilitsersuummi uani allaaserineqarput suliffeqarfinni mikinerusuni amerlanerpaamik qulingiluanik sulisulinni isumannaallisaaneq peqqinnissarlu pillugit suleqatigiinnermi malittarisassat. Ilitsersuut pineqarpoq, suliffeqarfinni mikinerusuni sullivimmi avatangiisit pillugit aaqqissuussinermik (AMO) pisussaaffigalugu pilersitsiviusimasariaqanngitsuni isumannaallisaaneq peqqinnissarlu pillugit suleqatigiinneq qanoq ingerlanneqassanersoq. Suliffeqarfinni 10-34-nik sulisulinni aamma suliffeqarfinni ikinnerpaamik 35-nik sulisulinni sullivimmi avatangiisit pillugit suleqatigiinnerit ilitsersuutini allani allaaserineqarput.

Sullivimmi avatangiisit pillugit suleqatigiinneq suliffeqarfinni 10-34-nik sulisulinni - AT-ilitsersuutit F.3.2

Sullivimmi avatangiisit pillugit suleqatigiinneq suliffeqarfinni ikinnerpaamik 35-nik sulisulinni - AT-ilitsersuutit F.3.3

Suliffiugallartuni aamma paarlakaattuni suliffinni sullivimmi avatangiisit qanoq aaqqissuussaaneqarsimanissaat pillugu immikkorluinnaq malittarisassaqarpoq, assersuutigalugu illuliorfinni, malittarisassalli allat tamarmik, sullivinni avatangiisit pillugit suleqatigiinnermut tunngasut, assigiipput. sullivimmi avatangiisit pillugit suleqatigiinnermut tunngasut, assigiillutik.

Suliffiugallartuni imaluunniit paarlakaattuni suliffinni illuliornermi aamma sanaartornermi suliffiusuni sullivimmi avatangiisit pillugit suleqatigiinneq - AT-ilitsersuutit F.3.4Suliffiugallartuni imaluunniit paarlakaattuni suliffinni illuliornermi sanaartornermiluunniit suliffiusuni sullivimmi avatangiisit pillugit suleqatigiinneq, illuliortiterneq aamma sanaartorneq ilanngunnagit - AT-ilitsersuutit F.3.5

Ilitsersuummi matumani siunnerfiupput sulisitsisut, sulinermik siulersuisut sulisullu suliffeqarfinni amerlanerpaamik qulingiluanik sulisunni.

1. Isumannaallisaaneq peqqinnissarlu pillugit suleqatigiinnissaq piumasaqaataavoq

Suliffeqarfiit sulisullit tamarmik isumannaallisaaneq peqqinnissarlu pillugit suleqatigiinnissaq pillugu maleruaqqusani pineqarput. Qaqugukkut suliaq sulitsisumut sullissinerunersoq pillugu ersarinnerusumik immikkoortumi allaaserineqarpoq.

1. Immikkoortoq 3-mi allaaserineqarpoq, sulisut amerlassusiinik kisitsinermi kina ilanngunneqassanersoq

Sulisitsisup akisussaaffigaa, suliap suliarineqartup isumannaallisaanikkut peqqinnissakkullu tamakkiisumik illersorneqarsinnaasumik ingerlanneqarnissaa, aammali pisortat sulisullu sullivimmi avatangiisit pillugit suleqataasussaapput. Taamaattumik sulisitsisoq pisussaaffeqarput pisortat sulisullu peqataatissallugit, taamaaqataanillu aamma pisortat sulisullu pisussaaffigaat suleqatigiinnermi peqataassallutik.

Pisussaaffiit taakku sullivimmi isumannaallisaanerup iluani suleqatigiinnermi ileqqussaasutut piffissami sivisuumi atuuttut ingerlateqqinneqarput. Tamanna isumaqarpoq, sulisitsisut, pisortat, sulisut aamma allat akisussaasut suleqataanissamik pisussaaffimmik saniatigut, suliat naliginnaasut eqquutsissallugit pisussaaffeqartut, sulinermi isumannaallisaanermut peqqinnissamullu tunngasut tamakkiisumik illersorneqarsinnaasuunissaannik qulakkeerinninnissamut.

2. Suliffeqarfissinni malittarisassat atuuppat?

Malittarisassat atuupput suliffeqarfinni sulisulinni tamani. Sulisoqarnersoq aamma sulisut qassiunersut paasiniaraanni, taava nalilerniagassaavoq, sulisitsisumut sulianik suliaqartoqarnersoq.

Sulisitsisumut sulianik suliaqartoqarnera nalilerniartillugu, ilaatigut makku pingaartinneqassapput,

• inuit sulinerminni ilitsersorneqarlutillu nakkutigineqarnersut
• inuit inuttut sulisinnaassuserminnik atuinissaminnik pisussaatitaanersut
• suliap suliarinissaanut inimik sullivimmik, maskinanik, sakkunik, atortussanik imaluunniit ikiuutissanik pisariaqartunik allanik, sulisitsisoq atugassiinersut
• suliap inernera ajussagaluarpat sulisitsisup

Nalornisoorfinni immikkorluinnaq pingaartuutinneqarsinnaavoq inuk suliarisimasaminut akilerneqarnersoq, tamannali qaqutiguinnaq isumaqatinneqarsinnaavoq.

Malittarisassat atuupput sulisup nammineq angerlarsimaffimmini suliaq suliarigaluarpaguluunniit, sulineq piffissaq suliffiusoq tamakkerlugu pippat imaluunniit akuttoqatigiimmik pisarluni.

Malittarisassalli atuutissanngillat sulineq ingerlanneqarpat

• sulisitsisup nammineq pigisaanut tunngasunik
• sulisitsisup ilaqutaanit inoqutigiinni ilaasumit

Piumassuseq najoqqutaralugu kattuffiliani, soorlu spejderini timersoqatigiillu peqatigiiffiini nalinginnaasumik sulisitsisumut sulianik ingerlataqartoqarneq ajorpoq. Taamaattumik isumannaallisaaniaqatigiit pillugit piumasaqaateqartoqanngilaq. Peqatigiiffinni sulisitsisumut suliamik ingerlatsisoqarpat taava paarlattuanik malittarisassat najoqqutarineqassapput. Tamanna aamma atuuppoq assersuutigalugu timersortartut klubbiini aningaasarsiutigalugu timersortartunut.

3. Suliffeqarfimmi annerpaamik qulingiluanik sulisoqarpa?

Suliffeqarfimmi sulisut amerlassusiat naatsorsorneqartillugu sulisunik aqutsisuunngitsut tamarmik naatsorsuinermi ilanngunneqassapput.

Sulisunik aqutsisoq sullivinni avatangiisit pillugit inatsit najoqqutaralugu tassaavoq sulisorisaq taamaallaat imaluunniit sulinermini annertunerpaamik sulisitsisoq sinnerlugu sulisunik aqutsinermik imaluunniit sulinermik nakkutilliinermik imaluunniit tamatuma ilaanik sulialik.

Piffissap ilaannaani sulisorisat aalajangersimanngitsumillu sulisorisat kisitsinermi aamma ilanngunneqassapput. Tamanna atuutinngilaq allanni aamma pisiniarfinni, tamakkunani sulisut sapaatip akunneranut minnerpaamik nalunaaquttap akunnerini qulini sulisartut kisimik kisitsinermi ilanngunneqassammata. Nalunaaquttap akunneri agguaqatigiissitsilluni naatsorsorneqassapput qaammatit pingasut iluanni aallaavigalugit.

Suliffeqarfimmi paarlattaasutut sulisuusut suliffeqarfimmi paarlattaasutut suliffigisartakkaminni sulisorisanut aamma ilanngunneqassapput. Aamma sulisut sannavinnni illersugaasuni aamma suliffissaqartitsiniutigalugu sulilersitsiniarlunilu suliniutini sulisut, tunisassiornermut ilinniarfinni assigisaannilu sulisut ilanngullugit kisinneqassapput.

Sulisut, nunani allani aamma suliffeqarfiup angerlarsimaffiani suliaqartut, suliffeqarfiup angerlarsimaffiani sulisit kisinneqarneranni ilanngunneqassapput. Sulisut taamaallaat nunani allani suliaqartut kisitsinermi ilanngunneqassanngillat suliffeqarfiup angerlarsimaffiani AMO pineqartillugu.

Suliffeqarfimmi ukiup qanoq ilineratigut suliffiusartumi AMO naammaginartumik piffissami atuuffeqarsinnaanngilaq. Taamaassaaq assersuutigalugu neriniartarfinni, pisiniarfinni tammaarsimaartarfinnilu, ukiup ilaani piffissami sivikitsuinnarmi ammasartuni, imaluunniit ukiup qanoq ilinera najoqqutaralugu sulisut amerlassusiat nikerarpat, assersuutigalugu nunalerinermi jordbær-inik nuniannermi. Taamaattumik suliffeqarfiit taamaattut sullivinni avatangiisit pillugit aaqqissuussaanermik pilersitsissapput, sulisut qulit amerlanerilluunniit ataatsikkut sulippata qaammatit aqqaneq marluk ingerlaneranni qaammatini pingasuniatasuinnarmik sulippata.

Sulisut amerlassusiat qulingiluat qulaappagit sulisitsisup psisussaaffigaa AMO-mik pilersitsissalluni.

Sullivimmi avatangiisit pillugit suleqatigiinneq suliffeqarfinni 10-34-nik sulisulinni - AT-ilitsersuutit F.3.2

Sullivimmi avatangiisit pillugit suleqatigiinneq suliffeqarfinni ikinnerpaamik 35-nik sulisulinni - AT-ilitsersuutit F.3.3

4. Sullivimmi avatangiisit pillugit suleqatigiinnermi suut atuuppat suliffeqarfinni amerlanerpaamik qulingiluanik sulisulinni?

Suliffeqarfinni amerlanerpaamik qulingiluanik sulisoqartumi isumannaallisaaneq aamma peqqinnissaq pillugu suleqatigiinneq ilusilerneqarsimassaaq, kisianni sullivinni avatangiisit pillugit aaqqissuussaanermik pilersitsinissaq pisussaaffiunngilaq. Ulluinnarni suleqatigiinneq ingerlasarpoq ingerlaavartumik toqqaannartumik attaveqarnikkut oqaloqatigiinnikkullu sulisitsisup, sulisut aamma sulisunik aqutsisut akornanni. Ukiumut ataasiarluni sullivimmi avatangiisit pillugit suliffeqarfimmi oqaloqatigiittoqartassaaq. Oqaloqatigiinneq pillugu immikkoortoq 5-mi atuaruk.

Sulisitsisup ataavartumik periarfissaqartissavaa sullivimmi avatangiisinik suliaqarneq pillugu sulisut siunnersuuteqarsinnaanissaat aammalu isumannaallisaanermut peqqinnissamullu paasissutissat pisariaqartut tamaasa pissarsiarisinnaassagaat. Tamatuma saniatigut sulisitsisup isumagissavaa sulisut tusarniaaviginissaat, teknologi nutaap atorneqalernissaa pilersaarutigineqarpat, tamatumunnga atortussanik toqqaanermi, imminut illersuutissanik, teknikkikkut atortussanik il.il. isumannaallisaanermut peqqinnissamullu kinguneqaataasussat ilanngullugit.

5. Ukiumoortumik sullivimmi avatangiisit pillugit oqaloqatigiinneq

Suliffeqarfiit tamarmik ukiumoortumik sullivimmi avatangiisit pillugit oqaloqatigiittassapput, ukiumi aggersumi sullivimmi avatangiisit pillugit suleqatigiinnissaq pilersaarusiorlugu aamma ukiumi kingullermi suleqatigiinneq eqqartorlugu. Oqaloqatigiinnermi suliffeqarfimmi sullivinni avatangiisit inissisimanerat aamma suliffeqarfik sutigut unammilligassaqarnersoq sammineqassapput. Sullivinnik Nakkutilliisoqarfiup nittartagaani najoqqutassaq peqataasut oqaloqatigiinnermi najoqqutarisinnaasaannik.

Najoqqutassaq Sullivinnik Nakkutilliisoqarfiup nittartagaani sullivinni avatangiisit pillugit oqaloqatigiinnerup ataaniippoq

Sullivinni avatangiisit pillugit oqaloqatigiinneq suliffeqarfiup sullivinni avatangiisit pillugit suliaqarneranut ilaavoq pingaarutilik. Oqaloqatigiinnerup siunertaraa sullivimmi avatangiisit pillugit suliaqarnermi suleqatigiinnerup pitsaanerpaamik aaqqissuunneqarnissaa. Taamaaliornikkut sullivimmi avatangiisitigut ajornartorsiutit pinaveersaarneqarsinnaapput, aamma nukissanik pitsaanerpaamik atuinissaq sinaakkuserneqarsinnaammat. Oqaloqatigiinnissami angusaqarluarnissaq siunertaralugu sulisitsisoq peqataasussallu allat piareersarsinnaapput.

5.1. Kikkut peqataassappat?

Sulisitsisup isumagissavaa oqaloqatigiinnerit pinissaat. Sulisitsisoq imaluunniit sinniisoq, sulisitsisoq sinnerlugu aalajangiisinnaasoq peqataassaaq peqatigalugit sulisut, imaluunniit sulisoq sulisulluunniit arlallit, suleqatitik sinnerlugit oqaaseqartartutut atuuffeqarsinnaasut.

5.2. Tamanna qanoq pissava?

Suliffeqarfiup nammineq aalajangersinnaavaa, ukiumoortumik oqaloqatigiinneq qanoq ingerlassanersoq. Ataatsimiinnertut immini aaqqissuunneqarsinnaavoq, internet imaluunniit video atorlugu ataatsimiinnerusinnaavoq, imaluunniit persuarsiorani ingerlanneqarsinnaavoq, assersuutigalugu peqataasut mail-it atorlugit attaveqatigiinnerisigut. Oqaloqatigiinneq aamma pisinnaavoq ataatsimiinnermut pisumulluunniit allamut atatillugu, sulisitsisup sulisullu katersuuteqqaffigisaanni.

5.3. Sullivimmi avatangiisit pillugit oqaloqatigiinneq sumut tunngassava?

Sullivimmi avatangiisit pillugit ukiumoortumik oqaloqatigiinnermi peqataasut oqaluuserisassat arlalllitoqaluuserissavaat:

1. Peqataasut aalajangissavaat ukiuni aggersuni suut
   Imaassinnaavoq suliffeqarfik immikkut ittunik unammilligassaqalertussaasoq, assersuutigalugu sullivimmi avatangiisini tarnikkut ajornartorsiutit imaluunniit maskiinat nutaat. Matumani suliffeqarfimmi sullivinnik nalilersugatai (APV) atorneqarsinnaapput sammisassat ukkanneqartussat nassaariniarnerini.

2. Peqataasut aalajangissavaat suleqatigiinneq qanoq
   Oqaluuserineqassaaq suleqatigiinneq qanorpiaq ingerlassanersoq, aamma sullivimmi avatangiisit tungaasigut siunertat anguniarlugit isumaqatigiissutaasimasut, qanoq iliorluni anguneqassanersut. Siunertat angujumallugit assersuutigalugu isumaqatigiissutigineqarsinnaavoq, akuttoqatigiissaakkanik ataatsimiittoqartarsinnaasoq, imaluunniit aqutsisut imaluunniit sulisut ingerlaavartumik imminnut ilisimateqatigiittarnerisigut, sullivimmi avatangiisit pillugit sulineq qanoq ingerlanersoq. Aamma sulisut sullivimmi avatangiisitigut ajornartorsiutit pillugit nalunaaruteqartarnissaat aaqqissuussaasumik ilusilersorneqarsinnaavoq.

3. Peqataasut nalilissavaat ukiup siuliani siunertaasimasut
   Ukiup siuliani assersuutigalugu napparsimalluni sulinngitsoortarnerit appartinneqarnissaat siunertarisimagaanni, taava siunertaq taanna anguneqarsimanersoq nalilersorneqassaaq.

4. Peqataasut ukiumi aggersumi suleqatigiinnermi suut siunertaassanersut
   Oqaluuserisassami 1-mi suliffeqarfimmi tarnikkut sullivimmi avatangiisit suliarissallugit qinersimagaanni, taava suliami tamatumani siunertaq aalajangerneqassaaq, assersuutigalugu sulisut suliaminnut qanoq sunniuteqarnerlutik misigisaasa pitsanngoriartinnissaat.
   Ukiup ingerlanerani suliffeqarfimmi pissutsit allat ukkanneqalersinnaapput, sullivimmi avatangiisit pillugit ukiumoortumik oqaloqatigiinnermi siunniunneqarsimasunit allaanerusut. Suliffeqarfimmi sulisoq assersuutigalugu sulinermi nalaani ajutoorsimavoq, pisorlu tamanna sullivimmi avatangiisit pillugit malittarisassat allat naapertorlugit suliarineqartussaavoq.

5. Peqataasut isummerfigissavaat suliffeqarfiup iluani sullivimmi avatangiisit pillugit pisariaqartumik ilisimasaqartoqarnersoq
   Sulisitsisup akisussaaffigaa, suliffeqarfimmi sullivimmi avatangiisit pillugit pisariaqartumik ilisimasaqartoqarnissaa. Imaassinnaavoq, atortussiat akuutissat ulorianartut suliarineqartut, piumasaqaataalluni immikkut ilisimasat tunngavigalugit suliarineqarnissaat. Taamatut ilisimasaqarneq suliffeqarfimmi pigineqanngippat, sulisitsisup qinersinnaavaa nammineq ilisimasaqarfigilissallugu, imaluunniit sulisut ilaata tamanna ilisimasaqarfigilissagaa isumagissallugu. Pingajuattut periarfissaavoq avataaniit sullivimmi avatangiisit pillugit siunnersortimik, imaluunniit siunnersortimik atuinissaq.
   Sulisitsisup akisussaaffigaa ukiumi aggersumi suleqatigiinneq pilersaarusiussallugu. Peqataasut isumaqataanngippata, naggataatigut sulisitsisup isumaa malinneqassaaq.

5.4. Sullivimmi avatangiisit pillugit oqaloqatigiinnerup inernera

Ukiumoortumik oqaloqatigiinnerup kingornatigut suliffeqarfimmut ersarissisimassaaq, ukiumi aggersumi suleqatigiinneq qanoq ingerlassanersoq.

Suliffeqarfiup isummerfigissavaa, aalajangikkat qanoq malitseqartissanerlugit. Suliffeqarfiup ilaatigut isumaliutigisinnaavaa:

• Ulluinnarni sulinermi, paasissutissanik, siunnersuutinik aalajangiinernillu, oqaloqatigiinnerup nalaani saqqummersimasunik, peqataasut qanoq ilillutik nassaarinneqqissinnaanerat
• Peqataasuunngitsut paasissutissanik paasitinneqarnissamut pisariaqartitsinerat sunaava, aamma qanoq iliorluni tamanna pissava
• Qanoq qulakkeerneqarsinnaava nalilerneqarsinnaassasoq anguniagaq aalajangerneqarsimasoq anguneqarsimanersoq

Pissutsit qanoq ikkaluarpataluunniit sulisitsisup isumagissavaa, isumannaallisaaneq peqqinnissarlu pillugit suleqatigiinnerup pinissaa, aamma suleqatigiinnermi peqataassaaq. Tamatumunna atatillugu sulisitsisup isumagissavaa, ukiumoortumik oqaloqatigiinnermi aalajangikkat malitseqartinnissaat, aamma aqutsisut sulisullu paasissutissinneqartarnissaat aamma pisariaqartumik naammattumik tusarniaavigineqartarnissaat.

5.5. Sullivinnik Nakkutilliisoqarfimmut suut uppernarsaatitut atussallugit piumasaqaataappat?

Sullivinnik Nakkutilliisoqarfik nakkutilliiartorpat, sulisitsisup allakkatigut uppernarsassavaa, sullivimmi avatangiisit pillugit ukiumoortumik oqaloqatigiinneq pisimasoq.

Sulisitsisup nammineq qinissavaa uppernarsaat qanoq ittoq atussanerlugu.

Sulisitsisoq, assersuutigalugu uppernarsaatitut immersugassaq, Sullivinnik Nakkutilliisoqarfiup nittartagaani, sullivimmi avatangiisit pillugit oqaloqatigiinnerup ataaniitoq, atorlugu krydsilersuisinnaavoq.

Ukiumoortumik sullivimmi avatangiisit pillugit oqaloqatigiinneq - pdf Sulisitsisup aamma qinersinnaavaa, oqaloqatigiinneq qanga pisimanersoq APV-mut allallugu.  Suliffeqarfiit oqaloqatigiinnermi imaqarniliorsimasut imaqarniliaq uppernarsaatitut atorsinnaavaat.

6. Pitsaasumik suleqatigiinneq sooq pingaaruteqarpa?

Suliffeqarfiit suliffiup iluani pitsaasumik suleqatigiinnermik pilersitsisinnaanera sullivimmi avatangiisit pillugit suleqatigiinnermi sakkussaavoq pingaarutilerujussuaq.

Suleqatigiinneq ingerlalluartoq sullivimmi avatangiisit pillugit suleqatigiinnermi qitiuvoq, pissutigalugu aalajangigassanik aalajangiinissamut piviusunngortinnissaanullu tunngaviussammat pitsaasoq. Sullivimmi avatangiisit suliffeqarfimmi tamanut tunngavoq. Sulisitsisoq aamma sulisut sullivimmi avatangiisit pillugit suliassanik ataatsimoorussillutillu ataatsimoortumik iluarsiiniarpata, tatigeqatigiinneq pilersinneqassaaq. Naleqarnerulersitsissaaq, aamma sulinermik nuannarinninnermik tunisissaaq.

Sulisitsisup aqutsisullu suliassaraat ingerlaavartumik suliniuteqarnissaq qulakkiissallugu, tamannali pissaaq sulisut suleqatigalugit. Sulisut ilisimasatik atorlugit pimoorussillutillu peqataanngippata, sulisitsisumut ajornakusoorsinnaavoq sullivimmi avatangiisit pitsaasut pilersinnissaat.

Suleqatigiinnermut pitsaasumut suut ilaappat:

• Tatigeqatigiinneq
• Tatiginninneq
• Ammasumik attaveqarneq
• Siunertaq sakkussallu ersarissut
• Ataatsimoorfissanik

7. Suliffeqarfiit sullivimmi avatangiisinik salliutitsisariaqarput

Suliffeqarfinni tamani - apeqqutaatinnagu qanoq angitigineq - isumatsialaassaaq sullivimmi avatangiisit aaqqissuussaasumik siumullu isigaluni suliarinissaat. Amerlasuut isumaqartarput, suliffeqarfinni mikisuni amerlanerpaamik qulingiluanik sulisulinni sullivimmi avatangiisit pillugit suleqatigiittoqartariaqanngitsoq, kisianni aamma matumani sulisitsisup suleqatigiinneq pilersaarusiorlugulu ilusilersortussaavaa.

Sullivimmi avatangiisit pillugit suliniuteqarnermi pingaartumik sulisitsisoq maligassiuisussaavoq. Sullivinnilu avatangiiseq pitsaasoq aningaasaliiffitsialaavoq, ilaatigut sulisut akornanni napparsimasarnerup appasinnerulerneranik malitseqarsinnaasoq.

Suliffeqarfiup aqutsisuisa, suliffeqarfiup sulianik ingerlatsinerini tamani sullivimmi avatangiisit salliutittariaqarpaat, periusissiorluni aqutsinermut ulluinnarnilu ingerlatsinermut, ilagitillugu. Sullivimmi avatangiisit ilaasariaqarput, suliffeqarfimmi periusissiorneq, naleqartitat tunngaviusut, pilersaarusiorneq, pitsaassusseq, aningaasaqarneq, piginnaanngorsaaneq il.il., oqaluuserineqartillugit. Taamaalilluni sullivimmi avatangiisit ilaassallutik siunissamut ungasinnerusumut atatillugu siumullu isigisumik suliffeqarfimmi aalajangersaasarnerni. Imaassinnaavoq assersuutigalugu tunisassiornerup allilerneqarnissaanut atatillugu, suliassanut nutaanut atatillugu, teknologimut nutaamut atatillugu, imaluunniit sulinerup allatut aaqqissuunneqarnissaanut atatillugu.

Suliffeqarfiup sulianik ingerlatsinerini tamani sullivimmi avatangiisit ilanngutivitsinniarneqarpata, tamanna sulisut suleqatigalugit pisariaqarpoq.

Tunuliaqutaq aamma atuaruk

Isumannaallisaaneq peqqinnissarlu pillugit suleqatigiinneq - Nalunaarut 1181 - 2010 - kingusinnerusukkut allannguutit ilanngullugit

Sullivinnik Nakkutilliisoqarfiup ilitsersuutai

Sullivimmi avatangiisit pillugit suleqatigiinneq suliffeqarfinni 10-34-nik sulisulinni - AT-ilitsersuutit F.3.2

Sullivimmi avatangiisit pillugit suleqatigiinneq suliffeqarfinni ikinnerpaamik 35-nik sulisulinni - AT-ilitsersuutit F.3.3

Suliffiugallartuni imaluunniit paarlakaattuni suliffinni illuliornermi aamma sanaartornermi suliffiusuni sullivimmi avatangiisit pillugit suleqatigiinneq - AT-ilitsersuutit F.3.4

Suliffiugallartuni imaluunniit paarlakaattuni suliffinni illuliornermi sanaartornermiluunniit suliffiusuni sullivimmi avatangiisit pillugit suleqatigiinneq, illuliortiterneq aamma sanaartorneq ilanngunnagit - AT-ilitsersuutit F.3.5