Spring over hovedmenu

Nutaarsiassat

Nutaarsiassat Sullivinnik Nakuutilliisoqarfik

Februar 2023

Kalaallit Nunaanni immikkut nakkutilliinermi suliniutit amerlasuunik peqqussusiinernik inerneqarput

Ajutoornerit amerlasuut – tassani ilai toqumik kinguneqartut  – kinguneraa, Kalaallit Nunaanni Sullivinnik Nakkutilliisoqarfik siunnerfeqartumik nakkutilliinermi suliamik naammassinnissimanera. Suliniut suliffeqarfinnut, sullivinnut avatangiisit pillugit ajornartorsiortunut tunngassuteqarpoq.

Kalaallit Nunaanni Sullivinnik Nakkutilliisoqarfik 2022-p naalernerani sulinermi ajutoortoqannginnissaa anguniarlugu suliaqarpoq, sanaartorfinni kiisalu quersuarni aamma niuertarfinni nakkartoqarsinnaaneranut aarlerinaarteqartunut sammivilimmik. Misissugassaqarsimappullu, Sullivinnik Nakkutilliisoqarfik ukiup naalernerani suliffeqarfinni taakkunani nakkutilliinermik ingerlatsigamik Nuummi, Ilulissani aamma Sisimiuni. Katillugit nakkutilliinerit 85-it 115-it missaannik qisuariarfiupput, taakkunani 30-t missaat inerteqqutinik aammalu 70-ingajaat erngertumik peqqussinerit.

“Qisuariaatit amerlassusaasa ersarilluinnartumik takutippaat, immikkut ittunik sulinermi ajutoortoqannginnissaa anguniarlugu suliaqartoqarnissamut pisariaqartitsisoqartoq. 2022-p ingerlanerani portusuumik nakkarluni annertuumik ajutoornerit arlallit takuagut  – ajoraluartumillu ilai toqumik kinguneqarput. Tamatuma matumani nakkutilliinermut suliniuteqarnissamut aaqqiissuussisussanngortippaatigut, tassani ukkatigineqarluni sanaartorfinni aamma quersuarni niuerfinnilu portusuumit nakkartoqartarmera,” Kalaallit Nunaanni Sullivinnik Nakkutilliisoqarfimmi immikkoortumi pisortaq, Casper Kronow oqarpoq.

“Portusuumit nakkarneq annertuumik ajoqusernermik kinguneqarsinnaavoq - ajornerpaamillu toqumik kinguneqarsinnaalluni. Aarlerinartoqarsinnaavoq ass. tummeqqanik aamma ikaanik kiisalu qaliaasaniissagaanni.   Taamaattumik pingaaruteqarpoq, sulinerup pilersaarusiorneqarnissaa aaqqissuunneqarnissaalu, portuusuumit nakkartoqarnissaanut taamaalilluni aarlerinartoqassanngimmat”, Casper Kronow oqarpoq. Ilanngullugu oqaatigaa, sulisitsisup qanoq sulineq ingerlanneqassanersoq ilitsersuinissani akisussaaffigigaa, nakkutilliillunilu ilitsersuinerit eqqortinneqarnersut. 

Suliniutip saniatigut Kalaallit Nunaanni Sullivinnik Nakkutilliisoqarfiup suliffeqarfiit Sullivinnik Nakkutilliisoqarfimmit pulaarneqarnikut oqaloqatigiilluni ataatsimiinnissamut aggersarpai. Tassani Sullivinnik Nakkutilliisoqarfiup suliniut oqaluttuaraa, Sullivinnik Nakkutilliisoqarfiup suna takusimaneraa qisuariarfigineraalu.

Suliniut Danmarkimi Sullivinnik Nakkutilliisoqarfik suleqatigalugu ingerlanneqarpoq. Piffissami taamak amerlatigisunik nakkutilliisoqarneranut sunniuteqaqataavoq. Kalaallit Nunaanni Sullivinnik Nakkutilliisoqarfiup nakkutilliinermi suliani nalinginnaasuni nakkartoqarnissaanut aarlerinartut aamma eqqumaffigai. 

Kalaallit Nunaanni Sullivinnik Nakkutilliisoqarfik sulisuminik amerlisitsivoq

Kalaallit Nunaanni Sullivinnik Nakkutilliisoqarfik nakkutilliisumik ataatsimik atorfinitsitseqqippoq, taamaalilluni siunissami nakkutilliisut tallimaalissallutik. Taamaaliornikkut Kalaallit Nunaanni tamarmi sullivinnik avatangiisit pillugit nakkutilliineq nukittorsarneqassaaq. Kalaallit Nunaanni Sullivinnik Nakkutilliisoqarfik peqataavoq sullivinni avatangiisit isumannaatsuullutillu, peqqinnartuullutillu ineriartorfiunissaannut, nakkutilliilluarnikkut, ukkassilluni isumaginninnikkut paasissutissiisarnikkullu.

Sullivinnik Nakkutilliisoqarfiup suliffeqarfinnik suleqatiginninnerani sammineqartarput suliffeqarfiit sullivinni avatangiisit pillugit piumasaqaatinik malinninnersut, taamatuttaarlu Sullivinnik Nakkutilliisoqarfiup suliffeqarfinni sullivinni avatangiisit pitsaanerulersinnissaat isumagaa, assersuutigalugu ataatsimiinnerit aqqutigalugit aamma suliffeqarfinnik suleqateqarnikkut, soorlu Suliffigissaaneq pillugu siunnersuisoqatigiinni. Kalaallit Nunaanni Sullivinnik Nakkutilliisoqarfik Danmarkimi Arbejdstilsyn-imut ilaavoq.

Marts 2020

Corona suliffimmilu avatangiisit pillugit apeqqutitit akineqarsinnaapput

Inuit qulit sinnerlugit suliffeqarfimmiissinnaappat? Qanorlu suliffeqarfiup sulisuni angerlarsimaffimmini sulinngitsut illersussavai?

Ulluni makkunani Corona pillugu Sullivinnik Nakkutilliisoqarfimmut apeqqutinik amerlasuunik aperisoqartarpoq. Taamaattumik nittartakkamik sanavugut, tassanilu apeqqutit apeqqutigineqarnerusartut akineqarput.

Nittartakkap qallunaatoortaani suliffeqarfimmi corona pillugu qanoq iliuuseqarnissamut takussutissanik nassaarsinnaavutit.

Uunga iserit på.dk/corona

Malugiuk akissutit atortullu tamarmik Kalaallit Nunaanni atorneqarsinnaanngimmata, inatsisitigut piffiit ilaat Kalaallit Nunaanni Danmarkimilu atuutinnerit assigiinnginnamik.

Nalorngissaguit suna Kalaallit Nunaanni atuunneqarnersoq uunga allassinnaavutit at@at.gl imaluunniit uunga sianerlutit  +299 34 25 90