Suliffeqarfinnik kattuffinnillu ataatsimeeqateqartarnerit

Sullivinnik Nakkutilliisoqarfik sapinngisamik akulikitsumik suleqatinik oqaloqatiginnittarusuppoq.

Tamatumani suliffeqarfiit, kattuffiit allallu pineqarput. Ataatsimiinnerit nalinginnaasuusinnaapput, Sullivinnik Nakkutilliisoqarfiup sullivinni avatangiisit pillugit ilisimatitsissuteqarfigisai imaluunniit soqutiginninnermik pilersitsiniarfigisai. Ataatsimiinnerit aamma sullivinni avatangiisinut tigussaasunut tunngasuusinnaapput.

Sullivinni avatangiisinik soqutiginnilersitsiniarluni Sullivinnik Nakkutilliisoqarfik assersuutigalugu Kalaallit Nunaanni suliffeqarfinni annerni aqutsisunik isumannaallisaanermilu ataatsimiititalianik ataatsimeeqateqartarpoq sullivinni avatangiisiminnik, ajutoornerit pitsaaliornissaannik aamma - ajutoortoqarsimappat - nalunaarutiginissaannik suliffeqarfiit isiginninniarnerulernissaannut periarfissat oqaluuseriumallugit.

Sullivinnik Nakkutilliisoqarfik aamma ataatsimiititsisarpoq suliaqarfimmi ajornartorsiutip aalajangersimasup oqaluuserineqarfigisaanik. Assersuutigalugu Sullivinnik Nakkutilliisoqarfik sanatitsisunik kiisalu sanaartornermi suliffeqarfinnik pilersaarusiortartunik siunnersuisartunillu tamanik ataatsimeeqateqarsinnaavoq sanaartorfinni sullivinni avatangiisinut tamarmik immikkut sunniuteqarsinnaanerannik eqqumaffiginninnerulersinniarlugit.