Nakuutilliineq

Sullivinnik Nakkutilliisoqarfiup suliffeqarfinnik suleqateqarnerani pineqartut tassaapput ilaatigut sullivinni avatangiisit pillugit inatsisinik suliffeqarfiit malinninnerannik nakkutilliineq, ilaatigullu Sullivinnik Nakkutilliisoqarfik suliffeqarfinni sullivinni avatangiisinik pitsaasunik siuarsaaniartarpoq assersuutigalugu ataatsimiititsisarnikkut kiisalu suliffeqarfinnik pisortatigoortumik suleqatiginninnikkut assersuutigalugu Suliffigissaasuni.

Suliffeqarfinnik nakkutilliineq

Sullivinnik Nakkutilliisoqarfik ukiut tamaasa nakkutilliinermut atatillugu arlalippassuariarluni misissuiartortarpoq. Ornigunnerit pisarpoq sullivinni avatangiisit pillugit malittarisassat malinneqarnerat misissoriartorlugu, kiisalu sullivinni avatangiisinut tunngasut qanoq pitsanngorsarneqarsinnaanerat ilitsersuutigiartorlugu. Nakkutilliinermut atatillugu ornigunneq suliffeqarfiup sullivinni avatangiisinut akisussaaffeqarneranik atorunnaarsitsissutaasumik akuersissutiginninnerusanngilaq, suliffeqarfiilli sullivinni avatangiisinik sulissutiginninnermik ingerlatseqqinnissaat anguniarlugu suliniarnermut attuumassuteqartarluni. 

Sullivinnik Nakkutilliisoqarfimmit nakkutilliinermut atatillugu ornigunneq inummit oqartussaassusilimmit - nakkutilliisumit - ingerlanneqartarpoq. Nakkutilliisoq tassaavoq suleqat suliassaqarfinni arlalissuarni ilinniakkatigut immikkut piginnaaneqartoq. Nakkutilliisoq assersuutigalugu tassaasinnaavoq maskiinalerisoq, sanaartukkanik ilusilersuisartoq imaluunniit timimik sungiusaasoq.