Asbesti

Sullivimmi avatangiisini asbesti.

Asbestip pujoralaanik ulorianartorsiortinneqarneq ulorianarsinnaavoq. Taamaattumik pingaaruteqarpoq qanorluunniit ulorianartorsiortinneqarnissap pinaveersaartinneqarnissaa.

Asbestitalinnik suliaqarussi asbestip pujorlaanik ulorianartorsiortinneqarsinnaavusi. Assersuutigalugu tamanna pisinnaavoq illunik 1990 sioqqullugu sanaanik igutserinermi, iluarsaassinermi imaluunniit aserfallatsaaliinermi.

Allanik suliaqarnermi aammma asbestip pujoralaanik ulorianartorsiortinneq pisinnaavoq. Assersuutigalugu sulinermi ingerlanerluunniit sumiiffimmi, asbestimik suliaqareernermi eqqiarluarneqarsimanngitsumi, imaluunniit illup qaliata initaani naqqulluunniit iluani, atortut asbestimik akullit aserorsimasut tamaaniippata.

Asbestip pujoralaanik sunnerneqarnissamut pinaveersaartitsineq

Sulisitsisoq pisussaavoq, suliap pilersaarusiorneqarnissaanut, aaqqissuunneqarnissaanut ingerlanneqarnissaanullu annertunerpaamik isumannaallisaateqassalluni, inuit sullivimmi avatangiisaanilu asbestip pujoralaanik sunnerneqannginnissaat anguniarlugu.

Asbestimik suliaqartoqartussaatillugu sulisitsisup ilaatigut pisussaaffigaa Sullivinnik Nakkutilliisoqarfik ilisimatissallugu, suliallu illersorneqarsinnaasumik ingerlanneqarsinnaaneranut iliuusissat pisariaqartut tamaasa aalajangiiffigissallugit.

Asbestimik suliaqarneq sunaava?

Asbestimik suliaqarneq tassaavoq atortussianik asbestiusunik asbestimilluunniit akoqartunik, atortussianik asbestimik mingutsinneqarsimasunik piiaaneq asbestillu pujoralaanik eqqiaaneq.

Atortussianik asbestinik akulinnik suliaqarneq amerlanertigut pisarpoq isaterinerni, iluarsaassinerni aamma aserfallatsaaliinerni ingammik illuni illullu ilaanik, atortussianik asbestinik akulinnik atuiffiusimasuni.

Asbestip pujoralaanik saliineq imminermini asbestinik suliaqarneruvoq. Asbestip pujoralaanik eqqiaaneq aamma tassaasinnaavoq asbestip eqqagassartaanik kukkusumik isumaginnittoqarsimatillugu saliineq, asssersuutigalugu atoqqiisarfinni.

Asbestimik aamma suliaqarneruvoq atortussianik asbestimik mingutsinneqarsimasunik piiaaneq, assersuutigalugu qaliat iluini kiffiutissanik asbestimik mingutsinneqarsimasunik, tamannali isaterinerunngilaq.

Asbestimik suliaqarnerit pillugit aamma allanik assersuutissaqarpoq, qulaani taaneqartut saniatigut, assersuutigalugu atortussiani asbestinik akulinnik ikuallattoqarsimatillugu imaluunniit nakkaattoortoqarsimatillugu saliinermi, imaluunniit misiligutinik katersinermi asbestimik imaqarneranik misissueqqissaarnissaq siunertaralugu.

Asbestimik uliaqarneq, assersuutigalugu isaterineq, naammassineqanngilaq, asbestimik akullit igitassat poorneqartinnagit suliaqarfiusumullu aaneqarnissaannut piareertinnagit, aammalu asbestip pujoralaanik inaarutaasumik sukumiisumik saliisoqarsimatinnagu.

Asbestip pujoralaanik sunnerneqarnissamut ulorianaatilimmik suliaqarneq

Sullivinni avatangiisini asbest pillugu inatsisit atuupput asbestimik suliaqarnermi, tassaalluni atortussianik asbestiusunik asbestimilluunniit akoqartunik, atortussianik asbestimik mingutsinneqarsimasunik piiaaneq asbestillu pujoralaanik eqqiaaneq.

Tamanna atuuppoq asbestimik suliaqarnermi, aamma sulinermi asbestip pujoralaanik sunnerneqarnissamut ulorianartoqartillugu. Suliat taamaattut ilaatigut tassaapput:

Sanaartorfimmi siusinnerusukkut asbestimik suliaqarfiusimasumi, naammattumik sukumiisumik eqqiaasoqarsimannginnera pissutigalugu asbestip pujoralaanik peqarfiusumi sanaartorfimmi sulisut suliaqarnerat. Assersuutigalugu suliaasinnaavoq innaallagissamut kabilinik nusutsineq imaluunniit naqqup ataani ruujorilerineq.
Illup qaliata ineerartaani kiffiutinik asbestimik mingutsinneqarsimasunik peqarfiusumi sulisut sulinerat. Assersuutigalugu silaannarissartarfinnik saliinerusinnaavoq imaluunniit qaliat quassuttoortaanik iluarsaassinerusinnaalluni.
Eqqakkanik asbestitalinnik isumaginninneq, atoqqiisarfimmi imaluunniit assartuinerup nalaani, poortuutissaq matoqqasoq putusinnaammat.
Viceværtip naqqup iluani suliaqarnera, asbestitalimmik ruujorit oqorsaateqarfigisaanni.
Nalinginnaasumik ikuallattoqarnerata nalaani, nakkaattoortoqarnerani imaluunniit ajutoortoqarnerani upalungaarsimasuutitat piffissami pinasuartumik suliaqarfiusussami, isumannaarneqarnissaanik suliaqarnermi, atortussianik asbestimik akulinnik isumaginninnerat. Assersuutigalugu ikuallattumik qamisaanerup imaluunniit illorsuup qerattaqqusersornerata nalaani atortussianik asbestimik akulinnik nussuinerit. Kingornatigut sulineq, assersuutigalugu asbestip pujoralaanik saliineq eqqiaanerluunniit asbestimik suliaqarneruvoq.
Nunamik asbestimik mingutsinneqarsimasumik sulineq isumaginninnerlu.
Asbestip pujoralaanik sunnerneqarnissamut ulorianaateqartoqartumik allatigut sulineq.

Taamaattuni sulinerit asbestimik suliaqarnerunngillat. Kisianni asbestip pujoralaanik sunnerneqarnissamut ulorianaateqarnera pissutigalugu, suliaq taamatulli inatsisit naapertorlugit pilersaarusiorneqassaaq aaqqissuunneqarluni ngerlanneqarlunilu. Pingaarnerpaamik piumasaqaataavoq, suliaq taamaattoq ingerlanneqassasoq, annerpaamik isumannaallisarneqarsimassalluni, inuit avatangiisillu asbestip pujoralaanik sunnerneqannginnissaat. Tamatuma malitsigaa, assersuutigalugu sukumiisumik eqqiaanissaq, asbestip pujoralaanik isugutatsitsilluni aalajangiinissaq, inummut illersuutinik atuinissaq aamma sulitilluni peqqinnissap tungaatigut iliuusissanik periarfissaqarnissaq.

Sanaartornermi atortussat asbest-imik akullit

Sanaartornermi atortunik asbestimik akulinnik atuineq inerteqqutaavoq Taamaattorli sanaartornermi atortussiat asbestitallit siornatigut inatsisitigut inerteqqutaanatik atorneqarnikuupput, taamaattumillu suli qallunaat sanaartorsimasaanni siumugassaavoq, iluarsaassinerni isaterinernilu peqqinnissamut ulorianartorsiortitsilluni. SBI-anvisning 229: “Sanaartornermi atortussiat asbestitallit” quppersagaavoq atortussianik asbestitalinnik imaqartutut ilismaneqartunik takussutissiaasoq, piffissami 1900-1990-ip ingerlanerani atorneqarsimasoq. SBI innersuussut at.dk-mi tamanut saqqummiunneqarnikuuvoq Sullivinnik Nakkutilliisoqarfiup aamma Statens Byggeforskningsinstittutip akunnerminni isumaqatigiissuteqarnerat malillugu.

Asbesti - AT-vejledning GL.3.1

Asbest pillugu misissueqqaarneq

1990 sioqqullugu illuliani suliaqarnermi asbestip fiberiinik naavianartunik najuussisoornissaq ulorianaateqarsinnaavoq. Sulisitsisutut qulakkeessavat, misissueqqaarnermi paasineqarsimassasoq, atortussiat suut asbestimik imaqarnersut ilimagineqarsinnaanersoq, isaterineq, iluarsaassineq aserfallatsaaliuinerluunniit aallartitsinnagu.

Misissueqqaarnissamut pisussaaffeqarneq atuuppoq illuni suliaqarnermi, sanaartukkani, installationinilu il.il. aamma assersuutigalugu amutsivinni umiarsuarnik suliaqarnermi.

Asbesteqarneranik misissueqqaarnermut ikorfartuutaasinnaapput paasissutissat, assersuutigalugu piginnittuniit. Atortussiami illumiluunniit asbesteqarneranik minnerpaannguamilluunniit pasitsaassisoqarpat, sulineq asbestimik suliaqarnertut isigineqassaaq taamalu asbest pillugu nalunaarummi malittarisassat malillugit sulisoqassalluni.

Asbest toqqorsimasoq immikkut pillugu

Asbest, toqqorsimasoq nalunaarsugaanngitsoq, ilaatigut illuni 1990 sioqqullugu sanaajusuni asbestip pujoralaanik taama piniarani siammarterisoqartoortoqarsinnaanera aarleqqutissaqarpoq. Tamanna atuupoq suliani annikinnerusuni iluarsaassinerni aserfallatsaaliuinernilu, kiisalu isaterinermik suliani anginerusuni. Isaterineq paasineqassaaq, atortunik asbestitalinnik, tamakkiisumik ilaannakortumilluunniit piaaneq. imaluunniit atortussianik asbestitalinnik aqqaatiterineq. Taamaattumik pingaaruteqarpoq, suliap aallartinnissaa sioqqullugu misissueqqaartoqarsimanersoq misissueqqaartoqarsimanersoq illit qulakkeeqqaarsimasussaagakku. Illu pillugu siusinnerusukkut misissueqqaarnerit pigineqarpata ilanngullugit atorsinnaavatit.

Suliassani annikinnerusuni, illit suliffiit kisimiilluni suliassaqarfimmi tassani suliaqartussaatillugu, sulisitsisutut sanaartortitsisoq aperisinnaavat, asbesteqarneranik ilisimasaqarnersoq. Sanaartukkanik allanngortiterinernit aserfallatsaaliuisimanernillu paasissutissat aamma tunngavissaasinnaapput, nalilerniarussiuk, asbesteqarsinnaaneranik ulorinaateqartoqarnersoq, aamma suliassaqarfiup sukumiisumik alakkarterneratigut peqataasinnaavusi, asbesteqarsinnaaneranut ulorinaateqartoqarneranik qulaajaaniarnermi. Atortussiat asbestitaqarnersut misissortikkit.

Suliassani, suliffeqarfiit minnerpaamik marluk ataatsikkut sulisussaatillugit, sanaartortitsisup qulakkeertussaavaa asbesteqarneranik misissuisoqarnissaa. Suliaq asbestip pujoralaanik pilersitsisinnaaneranik aarlerinaatillik pineqartillugu, sanaartortitsisup suliap pilersaarusiorneqarnerani ingerlanneqarneranilu Plan for Sikkerhed og Sundhed (PSS)-ianut aamma sullivimmi avatangiisit pillugit ataqatigiissaarineranut ilaatinneqassaaq.

Misissueqqarnerit pitsaassusiat pillugu

Illuni 1990 sioqqullugu sananeqarsimasuni, illumik isaterineq, iluarsaassineq aserfallatsaaliuinerluunniit aallartitsinnagu sukumiisumik misissueqqaartoqassaaq.

Isaterineq

Illunik 1990 sioqqullugu sanaajusunik tamakkiisumik ilaannakortumilluunniit isaterinermi pingaaruteqarpoq, pilersaarusiornermulli atatillugu sulinissallu pilersaarusiornerani aalajangereersimassallugu, sumi asbestitalinnik atortussiaqarnersoq. Tamanna ilaatigut pisinnaavoq illup oqaluttuassartaata misissorneratigut, illumit siusinnerusukkut asbestimik piigaqartoqarsimanera ilanngullugu. Illumi asbestimik amiakkoqarnera minnerpaannguamilluunniit pasitsaanneqarpat, tamanna pillugu illu misissuiffigineqassaaq.

Misissueqqaarneq misissuinermut siunertamut atatillugu tamakkiisuussaaq eqqortumillu tunngavilimmik suliarineqarluni. Nalinginnaasumik piumasaqaataavoq misissuinissamut tunngavissamik pilersaarusiortoqassasoq, atortut suut imaluunniit sanaartukkap ilai suut misiligutinik tigusiffigineqassanersut aamma asbestimik akoqarnerinik misissorneqartussanik. Pilersaarusiaq taamaattoq misiligutinillu tigusineq immineq amerlanerpaatigut suliarineqartussaasarpoq immikkut ilisimasalimmit, illuliani assigiinngitsuni suup tungaani asbestimik nassaassaqartarneranik il.il. immikkut ilisimasalimmit. Asbestimik akoqarneranik misissuinermi aamma immikkut ilisimasanik atortunillu pisariaqartitsisoqartarpoq.

Misissueqqaarneq nalinginnaasumik illup takuniarneqarnerani takusassarsiorfigalugu pisarpoq illup oqaluttuassartaa pillugu ilisimasat tunngavigalugit. Tassanngaaniit pilersaarut suliarineqartarpoq illup ilaani atortussiallu ilaanni assigiinngitsuni misiligutinik tigusinissaq. Illumik misissuineq siulleq amerlanerpaartaatigut pisarmat, illup najugaqarfittut suliffittulluunniit suli atorneqarnerata nalaani aamma ilanngullugu isummerfigisariaqarpoq, illup ilaani sumi, illup ilai assigiinngitsut, assersuutigalugu isaterlugit misiligutinik tigusiffigineqassanersut. Assersuutaasinnaavoq, perusuersartarfinni, uffarfinni igaffinnilu iikkat qalliutaannik flisinik piigaqarneq, nippoqqutaanit misiligummik tigusinissaq siunertaralugu, aamma naqqup qalliutaanik putusinissaq, narlorsaammik tarngummik asbesteqarneranik il.il. misissuinissaq siunertaralugu.

Iluarsaassineq aserfallatsaaliinerlu

Illunik 1990 sioqqullugu sanaajusunik iluarsaassinermi aserfallatsaaliinermilu, illup sananeqaataanik atortussianillu, assersuutigalugu putusinermi kipisinermiluunniit, taakkunani asbesteqarneranik misissuisoqassaaq. Suliaq aallartitsinnagu misissuineq ingerlanneqassaaq.

Misissuineq siullermik nalinginnaasumik isaannarmik pissaaq, illumi suliaqarfiup tungaani illup oqaluttuassartaa tunngavigalugu, asbestimik siusinnerusukkut peersisoqarsimappat aamma mattussisoqarsimaneraluunniit pillugu ilisimasat tunngavigalugit. Illup ilaani atortussianiluunniit asbesteqarsinnaaneranik annikinnerpaannguamilluunniit pasitsaassisoqarpat, suliamut kalluaasumik, misiligutissanik tigusisoqassaaq asbesteqarneranik misissorneqartussanik.

Amerlasuutigut pisariaqarpoq illumi immikkoortortani sulliviusussani asbesteqarnerinik misiligutissanik tigusinissaq misiligutillu asbestimik akoqarnersut suliamik ilisimasalimmut misissortinneqarnissaat.

Igutserineq, asbestip pujoralaanik annertuumik peqarfiusoq

Igutserinermi, asbestip pujoralaanik annertuumik peqarfiusumi, sullivigineqartoq avatangiisaanut assiaqusersortariaqarpoq tupermik taamaaqataanilluunniit pujoralammik pitarneqarsinnaanngitsumik. Sumiiffimmut assiaqusersukkamut isernissaq sulluliaq atorlugu pisassaaq. Sumiiffimmi assiaqusersorneqarsimasumi naqitsineq annikinnerutinneqassaaq, pujoralak sumiiffinnut allanut siaruatsaalillugu.

Imminut isumannaallisaatit

Asbestip pujoralaanik sunnerneqarnissamut ulorianartoqartillugu imminut isumannaallisaatit naleqquttut, anersaartornermut illersuutit ilanngullugit, atorneqassapput.

Imminut illersuutit naleqquttut atorneqassapput, asbestip pujoralaanik sunnerneqarnsissamut ulorianartoqartillugu. Tamanna atuuppoq asbestimik suliaqarnermi, aamma sulinermi asbestip pujoralaanik sunnerneqarnissamut ulorianartoqartillugu.

Nalinginnaasumik asbestimik suliaqartoqarsinnaanngilaq asbestip pujoralaanit ulorianartorsiortitsinngivilluni, qaamma suleriaatsini teknikkikkullu atortorissaarutinik, sapinngisamik annerpaamik pujoralatsitsinaveersaarutaasunik atuingaluaraanniluunniit, silaannarmillu milluaasumik pujoralaajaammik atortoqaraluaraanniluunniit. Assersuutigalugu qaliap qalliutai maligaasiortut pladit asbestinik akullit piiarneqarnerini inummut imminut illersuutinik atuisoqassaaq.

Qularnaarsimagaanni suliffimmi aalajangersimasumi asbestip pujoralaanik navianartorsiortitsisoqarsinnaanngitsoq pisariaqanngilaq sulisut imminut illersuutinik atuinissaat, taamaattorli suli naleqquttumik anersaartornermut assiaqummik tunineqassapput. Pisuni tamakkunani, assersuutigalugu milluaasut atorlugit pujoralaajaaneq imaluunniit suleriaatsit pujoralatsitsinngitsut atorlugit, pisinnaavoq. Tamanna isumaqarpoq, sulisut tulluartumik anersaartornermut assiaqummik tunineqassapput, asbestimik suliaqarunik annikitsumik asbestip pujoralaanik pujoralatsitsisumik.

Imminut illersuutit, sumiiffimmi asbestimik suliaqarfiusumi atorneqarsimasut, suliaqarfiup avataanut atorlugit anninneqassanngillat, peerneqarnissaallu sioqqullugu pujoralaajarneqaqqaassapput. Suliaqarfimmut assiaqut sulluliaq atorlugu iserfigissagaanni, imminut illersuutit pujoralaajarneqassapput sulluliamilu peerneqassallutik.

Sulisilluni imminut illersuutit atoreernerini misissorneqassapput aamma eqqarneqassapput, aalajangersumullu taaneqarsimasumut ilineqassalluti, assersuutigalugu sulisut atisalersortarfianni.

Imminut illersuutit atoqqinneqartussaanngitsut, pujoralammit pitarneqarsinnaanngitsumut katersorneqassapput aamma iginneqassapput, igitassatut asbestimik imalittut.

Anersaartornermut illersuutinik atuineq

Anersaartornermut illersuutinik atuineq taamaallaat pisariaqarluinnartuni pisassaaq. Tassa imaappoq, sulineq sapinngisamik pujoralatsitsinani isumagineqassaaq, imaluunniit asbestip pujoralaanik allatut ulorinartorsiortitsinertaqanngitsumik. Piffissami sivisunerusumi anersaartornermut assiaqutinik atorluni paaminarsinnaavoq, taamaattumillu unikaallattoqartassaaq, timikkut tarnikkullu tatineqarnerit eqqarsaatigalugit aalajangerneqartartussanik, suliap suussusia, kiassusia assigisaaluunniit eqqarsaatigalugit. Tamatuma saniatigut anersaartornermut illersuutit sulisut sulinerminni piffissami qanoq sivisutigisumi atorsinnaaneraat pillugu killilersuuteqarpoq.

Silaannarmik pilersorneqartumik anersaartornermut illersuuteqarluni sulinermi, sulisoq ullormut 6 tiimit qaangerlugit sulissanngilaq.
Silaannarmik pilersorneqartumik anersaartornermut illersuuteqarluni isaterinermi, sulisoq ullormut 4 tiimit qaangerlugit sulissanngilaq. Naleqquttumik qasuersaartoqartassaaq ataavartumik sulisimagaanni 2 tiimit qaangiunnerini.
Sukuluiaatitalimmik anersaartuuserluni turbo-taqanngitsumik inummut ullormut sulinermi akunnerit pingasut sinnissanngilai.

Sulinermi piffissap sinnerani sulisoqarsinnaavoq suliassanik anersaartuuteqarnissamik pisariaqarfiunngitsumi.

Anersaartornermut assiaqutit sorliit atornissaanni eqqarsaatigineqassaaq silaannaq asbestip pujoralaanik qanoq atsigisumik peqarnersoq aamma anersaartuutip illersuisinnaassuseqassusia. Anersaartuut suliamut naleqquttuunersoq pingaaruteqarpoq.

Anersaartornermut assiaqutit sukuluiaatitallit kiinamut assiaqutit (FFP1, FFP2 aamma FFP3) kiinnamut tunngaqqissaarneq ajorput amerlasuutigullu naammattumik illersuutaasinnaanatik. FFP3 qaffasinnerpaarluunniit sulinerup nalaani illersuisinnaassuseq 10 taamaallaat angusinnaagaa naatsorsuutigineqarsinnaavoq. Tamanna isumaqarpoq silaannarmi asbestip pujoralaai 10 %-it isersinnaasut kiinarpaq pitarlugu avaqqulluguluunniit.

Taamaattumik pisariaqarpoq anersaartornermi assiaqummik, kiinnamut naammattumik sitsiaatsumik tutsinneqarsinnaasumik atuinissaq. Anersaartuut assiaqut sukuluiaatitalik turbo-mik atortulik imaluunniit anersaartuut assiaqut silaannalersuutitalik naleqquttut atorneqarsinnaapput. Sullivimmi avatangiisini asbestimut killissarititaasut sukangasuujuneri pissutigalugit naatsorsuutigisariaqarpoq sulinermut P2-filter-it qaqutiguinnaq naleqquttuusinnaasut. Asbestip pujoralaanik annertuumik peqarfiusumi, assersuutigalugu igutserinermi asbestip pujoralai annertuppata, naatsorsuutigisariaqarpoq naammattumik illersornissaq qularnaarniarlugu anersaartuummik assiaqummik silaannarmik pilersorneqartumik atuinissaq.

Atisanik imminut illersuutinik atuineq

Imminut illersuutit atisat, niaqqumut illersuut ilanngullugu, atallaajusinnaapput ataasiartakkat pujoralammut illersuutaasut, nasaasallit imaluunniit annoraaminermik sanaat atallaat pujoralammik tigooqqaasuunngitsut. Atallaat atoqqinneqassappata, eqqorneqassapput atisanut allanut akulerunnagit, errorsisarfimmullu assartorneqarneranni matoqqasumik poorsimassapput, ersarissumik nalunaaqutserneqarsimassallutik, imarisai asbestimik pujoralaanik nassataqarsinnaasut.

Eqqakkanik asbestitalinnik suliaqarneq

Atortussiat asbestitallit atorunnaarsimasut, asbestitalittut eqqakkatut iginneqassapput. Tamanna aamma asbestip pujoralai eqqarsaatigalugit atuuppoq.

Eqqagassat asbestitallit paarineqassapput assartorneqarlutillu poortuutit naleqquttut matoqqasut atorlugit. Eqqakkat asbestitallit pujoralatsitsisartut - assersuutigalugu teknikkikkut oqorsaatit, flisinut nippoqqutit aamma illup qaavini qalliutit naffakut - poorneqarnissaat sioqqullugu isugutsertinneqaqqaassapput.

Poortuut nalunaaqutserneqarsimassaaq asbestimik imaqartoq.

Poortuutip qulakkeersinnaassavaa, asbestip pujoralaasa paarineqarnerminni assartorneqarnerminnilu inunnut avatangiiserineqartumiittumi siaruaatinnginnissaat.