Suliffiit isumannaallisaanermik peqqinnissamillu suliarisaat

Ujarliutit

1 - Isumannaallisaanermik peqqinnissamillu suliarisaq qaqugukkut aaqqissuunneqassava?
2 - Isumannaallissaniaqatigiit suuppat?
3 - Qaqugukkut malitarissat atuuppat?
4 - Suliffiit sorliit pineqarpat?
5 - Sunaava suliffeqarfik?
6 - Sulisut amerlassusaasa nalunaarsornerini kikkut ilanngunneqarpat?
7 - Kina sulisitsisuua aamma kina sulinermik siulersuisuua?
8 - Sulisisitsisup pisussaatitaaffii aamma pisinnaatitaaffii
9 - Sullivimmi isumannaallisaanermik suliamut piffissarititaq ilinniartitaanerlu, kiisalu akiliissutaasut
10 - Immikkut paasisimasalimmut saaffiginninneq
11 - Isumannaallisaaniaqatigiinnik sulisitsisup sunniivigeqateqarnera
12 - Suliffeqarfiit isumannaallisaaniaqatigeeqanngitsut
13 - Suliffeqarfimmi ataatsimi sulisitsisut arlallit allallu akornanni suleqatigiinneq

Suliffeqarfiit isumannaallisaanermik peqqinnissamillu suliarisaminnik qanoq aaqqissuussinissaat pillugu At-ilitsersuut paasissutissiivoq. Isumannaallisaaniaqatigiit suunerannik, qaqugukkut suliffeqarfik isumannaallisaaniaqatigiinnik pilersitsisissaneranik suliffeqarfiillu sorliit isumannaallisaaniaqatigiinnik peqartussaanerannik ilitsersuut paasissutissiivoq. Kiisalu sulisitsisup pisussaatitaaffiinik pisinnaatitaaffiinillu ilitsersuut paasissutissiivoq.

1. Isumannaallisaanermik peqqinnissamillu suliarisaq qaqugukkut?

Suliffeqarfiit tamarmik sulisoqartut isumannaallisaanermik peqqinnissamillu suliarisaqassapput.

Qulinik imaluunniit amerlanernik suliffeqarfik sulisoqaruni isumannaallisaaniaqatigiiliornissaa pingaarnerutillugu malittarisassaavoq.

Suliffiugallartunut aamma paarlakaattuni suliffinni, taakkununnga ilanngullugit illuliornermik sanaartornermillu suliffinni, kiisalu umiarsuarnik usingiaallunilu usilersuinermi immikkut ittunik malittarisassaqarpoq.

Suliffeqarfiit isumannaallisaaniaqatigiinnik pilersitsisussaanngitsut aamma isumannaallisaanermik peqqinnissamillu suliarisaqassapput. Tamanna sulisitsisup, sulinermik siulersuisuusinnaasut sulisorisallu akornanni suleqatigiinnikkut pissaaq. 1. januar 2008-mit atuutilersumik suliffimmik naliliiffiginnissusiortoqarnissaannik (APV-mik) piumasaqaateqartoqalerpoq. Suleqatigiinneq sulisut sinniisuata sulitsisisumik imaluunniit sulinermik siulersuisumik peqateqarluni isumannaallisaanermik peqqinnissamillu suliarisamik isumaginnittunngortillugit ileqqussanngortinneqarsinnaavoq.

2. Isumannaallissaniaqatigiit suuppat?

Isumannaallisaaniaqatigiit immikkoortortani tamani imaluunniit sulinermik siulersuisoqarfinni isumannaallisaanermik suleqatigiissitaliortoqarneratigut pilersinneqartarput. 20-t sinnerlugit sulisoqarpat tamatuma saniatigut isumannaallisaanermut ataatsimiititanik pilersitsisoqarsimassaaq. Suliffeqarfik angisoorsuuppat isumannaallisaanermut ataatsimiititat arlaliusinnaapput, suliallu ataqatigiissinniarneranut qullersaasussamik isumannaallisaanermut ataatsimiititanik pilersitsisoqartariaqarsinnaavoq.

Suliffeqarfinni anginngitsuni isumannaallisaaniaqatigiit isumannaallisaanermik suleqatigiissitanit ataasiinnarnit pilersinneqarsimasinnaavoq, suliffeqarfinnili angisuuni isumannaallisaanermik suleqatigiissitanik aamma isumannaallisaanermut ataatsimiititanik arlalippassuarnik aammalu immaqa qullersaasumik isumannaallisaanermut ataatsimiititanik peqartoqarsinnaavoq.

Sulisitsisup isumannaallisaaniaqatigiit sulisuusut sulinermillu siulersuisut suleqatigalugit pilersittussaavaa. Sulisorisat isumannaallisaanermik suleqatigiissitani sulinermik siulersuisoq peqatigalugu ilaasortaasussamik isumannaallisaanermut sinniisussamik qinersissapput. Sulisitsisup suleqatigiittoqarsinnaanera isumannaassavaa, tassunga ilanngullugu sulisut isumannaallisaanermik sinniisussamut qinersinissaannut naammattunik piffissalerlugillu periarfississallugit.

Isumannaallisaaniaqatigiit ilusilersornerini allannguutit tamarmik sulisitsisup, sulinermik siulersuisuusinnaasut sulisorisallu akornanni suleqatigiinnikkut pissapput.

Isumannaallisaaniaqatigiit Sullivinnik Nakkutilliisoqarfiup isumannaallisaanermik suleqatigiissitat aamma isumannaallisaanermut sinniisut pillugit ilitsersuusiaani, kiisalu isumannaallisaanermut ataatsimiititat pillugit ilitsersuummi erseqqinnerusumik nassuiarneqarput.

Ilitsersuutini taakkunani marlunni nassuiarneqartumit allaanerusumik isumannaallisaanermik peqqinnissamillu suliarisap aaqqissuunneqarnissaa pillugu suliffeqarfimmi sulisitsisoq sulisorisallu isumaqatigiissusiorsinnaapput. Tamanna pillugu periarfissaq suliffeqarfiit isumannaallisaanermik peqqinnissamillu suliarisaat pillugit isumaqatigiissutaasunik Sullivinnik Nakkutilliisoqarfiup ilitsersuusiaani erseqqinnerusumik nassuiarneqarpoq.

3. Qaqugukkut malittarisassat atuuppat?

Suliffeqarfiit isumannaallisaanermik peqqinnissamillu suliarisaat pillugit malittarisassat pingaarnerutillugit nunap qaani, umiarsuarnik usingiaallunilu usilersuinermik sulianut, kiisalu umiarsuit iluini amutsivinni sulianut tamanut sulisitsisumut sulissutigisanut atasuupput.

Sullivinni isumannaallisaanermik inatsimmut atasuusutut sulisitsisumut sulissussineq pillugu naliliissagaanni makku ilaatigut pingaartinneqartartuupput:

• suliamik tigusisoq nammineq sulisinnaassutsiminik atugassiinissaminut pisussaatitaanersoq
• suliamik tigusisoq suliap suliarineranut atatillugu ilitsersorneqarnissamik nakkutigineqarnissamillu malittarisassaqartitaanersoq
• sulisitsisoq ininik suliffigisassanik atortussanillu pisariaqartitanik atugassaqartitsinersoq
• sulinerup inernerata naammaginanngitsuusinnaaneranik sulisitsisoq tigusinnittussaanersoq.

Nalornisoqartoqarpat suliamik tigusisoq suliamik naammassisaminut aningaasarsisinneqarnera pingaartuutinniarneqartarpoq.

Isumannaallisaaniaqatigiit pillugit malittarisassat aamma atuupput suliaq sulisup nammineq angerlarsimaffiani ingerlanneqarneratigut, sulineq piffissami suliffiusumi tamarmmi ingerlanneqarpat imaluunniit akuttoqatigiiaartumik ingerlanneqarpat.

Suliap ingerlanneqarnerani isumannaallisaaniaqatigeeqassanngilaq

• suliitsisup angerlarsimaffiani pippat
• sulisitsisup ilaqutarisaanit angerlarsimaffiani najugaqartunit suliarineqarpat
• sakkutooqarfimmeersuneerpata, sakkutuujunertullu sulianut naatsorsuunneqarsinnaappata.

Piumassuseq najoqqutaralugu kattuffiliani, soorlu spejderini timersoqatigiillu peqatigiiffiini nalinginnaasumik sulisitsisumut sulianik ingerlataqartoqarneq ajorpoq. Taamaattumik isumannaallisaaniaqatigiit pillugit piumasaqaateqartoqanngilaq. Peqatigiiffinni sulisitsisumut suliamik ingerlatsisoqarpat isumannaallisaaniaqatigiit pillugit malittarisassat najoqqutarineqassapput.

4. Suliffiit sorliit pineqarpat?

Isumannaallisaaniaqatigiit pilersinneqarneri pillugit malittarisassanut atasuusussatut suliffeqarfiit qulinik imaluunniit amerlanernik sulisullit pineqarput.

5. Sunaava suliffeqarfik?

Suliffeqarfik inummit ataatsimit imaluunniit piginneqatigiinnit pigineqarsinnaavoq.

Aktianik piginneqatigiiffik, piginneqatigiiffik assigisaalluunniit naliginnaasutut suliffeqarfittut ataatsitut isigineqartarpoq. Suliffeqarfissuuppat, pingaarnersatut piginneqatigiiffilik, soorlu ingerlatseqatigiinni piginnittumik, arlalinnik allamit aqutanit piginneqatigiiffittalik suliffeqarfiit ataasiakkaatut, tamarmik immikkut isumannaallisaaniaqatigiinnik pilersitsisussatut isigineqartarput.

Suliffeqarfinni tunisassiorfittat suliffeqarfiup immikkoortuisut isigineqartarput, taamaattumillu taakku ataatsimoorussatut isumannaallisaaniaqatigiinnut, immikkoortortaqarfinnik tamanik ilaasortaqarfiusumut atasuussapput.

Suliffeqarfiit imminut pigisut, peqatigiiffiit, aningaasaateqarfiit, qaammarsaatissiiniaqatigiit assigisaallu immikkoortuupput namminersortut, taamaattumillu namminersortunik isumannaallisaaniaqatigiinnik pilersitsissapput.

6. Sulisut amerlassusaasa nalunaarsornerini kikkut ilanngunneqarpat?

Isumannaallisaaniaqatigiinnik pilersitsisoqarniarluni nalunaarsuinermi sulisut tamarmik, ullup ilaannaani suliffeqartut ilanngullugit, suliffimmi imaluunniit sulinermik siulersuisuunngitsut ilanngunneqassapput. Tamannali atuutinngilaq allaffinni pisiniarfinnilu, taakkunani sap. akunneranut minnerpaamik nal. akunnerinik qulinik sulisuusartut ilanngunneqartussaallutik. Nal. akunneranut kisitsit qaammatit pingasut ingerlaneranni agguaqatigiissitsinertut naatsorsorneqassaaq.

Sinniisuusut, suliffeqarfimmi paarlattaasutut sulisuusut sulisorisanut aamma ilanngunneqassapput.

Sulisorisat nunani allani aammalu suliffiup angerlarsimaffiani tamani suliaqartuusut suliffiup angerlarsimaffiani sulisorineqartutut ilanngunneqarput. Taamaattorli sulisorisat taamaallaat nunani allani suliaqartuusut suliffiup angerlarsimaffiani isumannaallisaaniaqatigiit pilersinniarneranni ilanngunneqassanngillat.

Suliffeqarfinni ukiup ilaani suliaqarfiusartuni, soorlu neriniartarfiit aalajangersimasut pisiniarfiillu ukiup ingerlanerani piffissami sivikinnerusumi ammasartuni isumannaallisaaniaqatigiit piffissamik naammaginartumik atuuffigisaqassanngilaq. Taamaattumik ukiup ataatsip iluani minnerpaamik qulinik sulisoqarlutik, sulisuusut tassani sulinertik ilutigalugu suliffeqarfimmi minnerpaamik qaammatini pingasuni suliffeqartuuppata ileqquuvoq suliffeqarfiit tamakku isumannaallisaaniaqatigiinnik pilersitsissanerat.

7. Kina sulisitsisuua aamma kina sulinermik siulersuisuua?

Sulisitsisoq/suliffeqarfimmik siulersuisoq tassaavoq suliffeqarfimmik ingerlatsisuusoq, imaluunniit pisortaasuni peqataasoq – assersuutigalugu pisortat qullersaat imaluunniit suliffeqarfiup imminut pigisup pisortaa.

Sulisorisat suliffeqarfimmi aktiaateqartut imaluunniit piginneqataasut nalinginnaasutut sulisitsisuusutut isigineqarneq ajorput – sulinermik siulersuisutut atuuffeqarneri eqqaassanngikkaanni.

Sulinermik siulersuisoq tassaavoq sulisorisaq sulinermini minnerpaamik piffissap affaanik sulisitsisoq sinnerlugu suliffeqarfimmi siulersuinermik imaluunniit sulinermik nakkutilliinermik imaluunniit tamatuma ilaanik sulialik.

8. Sulisisitsisup pisussaatitaaffii aamma pisinnaatitaaffii

Sulisitsisup isumannaallisaanermik peqqinnissamillu suliat aaqqissuutissavaa suliffimmilu isumannaallisaanermik sulinerup ingerlanneqartilernissaanut peqataaqataassalluni.

Sulisorisat isumannaatsuullutillu peqqissuunerinik isumannaatsuutitsisunik aammalu isumannaatsuunikkut peqqissutsikkullu aarlerinaataasinnaasunik pinaveersaarisunik iliuutsinik sulisitsisoq aaqqissuussaqarnermik isumaginnissaaq. Tamakku saniatigut sulisorisat aarleqqutaasinnaasut pillugit ilisimatinneqarnissaannik, kiisalu ilitsersorneqarlutillu ilinniartitaanerinik sulisitsisoq isumannaarissaaq.

Isumannaatsuuneq peqqissuunerlu pillugit suleqatigiittoqalerneranik, taamatuma ineriartortinneranik ataavartittuarneranillu sulisitsisoq isumaginnissaaq, taamaalilluni isumannaallisaaniaqatigiit suliassaminik naammaginartumik isumaginnissinnaanissaanut periarfissiissalluni.

Suliffeqarfimmi qullersatut pisortat isumannaallisaaniaqatigiinni sinniisoqarnissaat sulisitsisup isumagissavaa, tassunga ilanngullugu qullersatut pisortani sinniisi isumannaallisaanermut ataatsimiititani siulitaasuunissaa isumagissallugu.

Isumannaallisaanermut ataatsimiititat aammalu suleqatigiissitat immikkoortoqarfiinut atasunik suliffeqarfiup pilersaarusiorneranni peqataasinnaanissaat sulisitsisup isumagissavai, tassunga ilanngullugu inatsisit najoqqutaralugit pisussatut isumannaallisaanermik peqqinnissamillu pissutsit naliliiffigineqarnerat.

9. Sullivimmi isumannaallisaanermik suliamut piffissarititaq ilinniartitaanerlu, kiisalu akiliissutaasut

Sullivimmi isumannaallisaanermik suliamut atatillugu isumannaallisaanermik suleqatigiissitani, isumannaallisaanermut ataatsimiititani ilaasortat aammalu isumannaallisaanermik peqqinnissamillu suliamik ulluinnarni aqutsisup suliassaminnik isumaginninnissaminnut piffissamik pisariaqartitaminnik atugassaqartinnissaannik sulisitsisoq isumaginnissaaq. Tamanna ilaatigut suliffeqarfimmi isumannaallisaanermik suleqatigiissitat suliffigisaanni immikkoortortani Sullivinnik Nakkutilliisuutitat misissuiartorneranni peqataanissamut piffissaqartitaanissamut tunngasuuvoq. Suliffeqarfiup suuneranut aammalu sullivimmi isumannaallisaanermut inissisimaffianut atatillugit piffissaq naammattuutinneqassaaq.

Taamaalilluni isumannaallisaaniaqatigiinni ilaasortat atugassamittut piffissarititaat immikkoortortaqarfiit, suliaqarfigisat aammalu suliffeqarfiup suuneranit angissusaanillu, kiisalu sulisorisat aarleqquteqarfiuffiisa suunerinit aalajangerneqarpoq.

Isumannaallisaanermik peqqinnissamillu suliaat ingerlalluarlutillu sunniuteqarluartilerlugit ulluinnarnik pisussaatitaaffimminnik isumannaallisaaniaqatigiit ilaasortaasa isumaginnilersinnaanissaanut periarfissaqartilivillugit sulisitsisoq taama annertutigisumik piffissaqartitsitigissaaq.

Isumannaallisaaniaqatigiit ilaasortaannut piffissap qanoq annertutigisup atugassiaritinnissaa – isumannaallisaaniaqatigiit tusarniaavigereernerisigut – sulisitsisup nalilissavaa. Isumaqatigiinngittoqalerneratigut apeqqut Sullivinnik Nakkutilliisoqarfimmut saqqummiunneqarsinnaavoq.

Apeqqutini isumannaallisaanermut peqqinnissamullu tunngasuni isumannaallisaanermik suleqatigiisitat ilaasortaasa pisariaqartinneqartutut ilisimasassanik pissarsinissamut imaluunniit ilinniartitaanissamut sulisitsisup periarfississavai.

Ilinniartitaanermut isumannaallisaanermik suleqatigiissitat aningaasartuutaannik sulisitsisoq akiliissaaq. Aammattaaq ilinniartitaanermi peqataanermut atatillugu isertitarisanik annaasaqarnermik aningaasartuutinillu allanik sulisitsisoq akiliissaaq, assersuutigalugit pikkorissarnermut akiliutinik aamma angalanermi najugaqarnermilu aningaasartuutinik.

Isumannaallisaanermik peqqinnissamillu suliamut atugassanngorlugit pisariaqartitatut aningaasassaqarnissaanik sulisitsisoq isumaginnissaaq. Ilaatigut tamatuma nassataraa isumannaallisaanermik sinniisitut suliassanik isumaginninnermut atatillugu isumannaallisaanermik sinniisip isertitamigut annaasaanik sulisitsisup matussusiinissaa, tassunga ilanngullugit taassuma ataatsimiinnerni allatullu sammisaqarnerni peqataaqataaneri.

Isumannaallisaanermik sinniisuusup sammisarisaanut atatillugu qaqugukkut qanorlu annertutigisumik sulisitsisup aningaasartuutinik matussusiinissaanik isumaqatigiinnginnerit sulisitsisut sulisullu akornanni aalajangiiffigineqassaaq. Tamanna pisinnaanngippat eqqartuussivitsigoortinneqartariaqassaaq.

10. Immikkut paasisimasalimmut saaffiginninneq

Sullivinni avatangiisini ajornartorsiutip aaqqiiviginiarneranut ikiorneqarnissaminut sulisitsisoq immikkut paasisimasalimmut saaffiginnissinnaavoq.

Sulisitsisup nammineq pisariaqartitatut sammisamut ilisimasassaqannginnermini immikkut paasisimasalimmut sulisitsisoq saaffiginnissaaq.

Immikkut paasisimasalimmut saaffiginninnissani sioqqullugu sulisitsisup isumannaallisaanermut ataatsimiititat aammalu isumannaallisaanermik suleqatigiissititat saaffiginnissummut attuumassuteqartuusut tusarniaavigeqqassavai.

Sullivinni avatangiisinut pingaarutilinnik paasissutissanik pisariaqartitanik tamanik immikkut paasisimasalik sulisitsisup pissarsiorsinnaatissavaa.

11. Isumannaallisaaniaqatigiinnik sulisitsisup sunniivigeqateqarnera

Isumannaallisaaniaqatigiit aamma isumannaallisaanermik suleqatigiissitat immikkoortortaasa iluini sullivinni avatangiisinut pingaaruteqartunik paasissutissanik tamanik isumannaallisaanermut ataatsimiititap ilaasortaannik ilisimatinnissaannik sulisitsisoq pisussaatitaavoq.

Tamakku Sullivinnik Nakkutilliisoqarfimmit peqqussutinut allanillu aalajangiussinernut, kiisalu ilitsersuutitut atugassianik allanillu allakkatigut paasissutissanut atasuupput.

Isumannaallisaaniaqatigiinnut tamakkiisunut isumannaallisaanermillu suleqatigiissitanut ataasiakkaanut suut pingaaruteqartuunerannik erseqqinnerusumik killilersuinissaq isumannaallisaaniaqatigiit isumagissavaat. Paasissutissiissutinik pineqartunik qanoq kikkunnullu ingerlatitseqqinnissamut isumannaallisaaniaqatigiit malittarisassiornissat Sullivinnik Nakkutilliisoqarfiup innersuussutigaa.

12. Suliffeqarfiit isumannaallisaaniaqatigeeqanngitsut

Suliffeqarfinni isumannaallisaaniaqatigiinnik pilersitsisoqarnissaa pillugu piumasaqaateqarfiunngitsuni isumannaallisaanermut peqqinnissamullu pingaaruteqartunik paasissutissanik pisariaqartitanik tamanik sulisorisanut tunniussaqarnissaq sulisitsisup isumagissavaa. Suliffeqarfimmi isumannaallisaaneq peqqinnissarlu pillugit sulisorisat siunnersuutinik saqqummiussinissaminnut periarfissaqarnissaat sulisitsisup aamma isumagissavaa.

Tamakku saniatigut teknologiip nutaap pilersaarusiorlugulu atuutsilernerani sulisorisat tusarniaaviginissaat sulisitsup aamma isumagissavaa, tassunga ilanngullugit atortussiat, inunnut illersuutit teknikkikkullu atortut toqqarnerisigut sullivinni avatangiisinut sunniutaasut pillugit.

Suliffeqarfinni isumannaallisaaniaqatigiinnik pilersitsiviusussaanngitsuni sullivinni avatangiisinut suliaqarnermut aalajangersimasunik malittarisassiornissaq isumassarsialatsiaasinnaavoq. Taamatut iliorneq sullivinni avatangiisit pillugit pissusissamisoortumik oqaloqatiginninnissap eqqarsaateqarnerullu pilersinnissaanut ilapittuutaasinnaavoq.

13. Suliffeqarfimmi ataatsimi sulisitsisut arlallit allallu akornanni suleqatigiinneq

Suliffeqarfinni ataasiakkaani isumannaallisaanermik sulinermut pisussaasumut suliffeqarfimmi ataatsimi sulisitsisut arlallit allallu akornanni suleqatiginneq pillugu malittarisassiat tapiliussaapput. Sulisitsisuugaluaraanni, sulinermik siulersuisuugaluaraanni imaluunniit sulisuugaluaraanni, aammalu sorlermi suliffeqarfimmi atorfeqaraluaraanni sullivimmi kikkut tamarmik sullivinni avatangiisinut tamakkiisumik iliuuseqarnissaannik malittarisassat isumannaarneqartassapput. Malittarisasssat isumannaallisaaniaqatigiit kisiisa pinnagit suliffeqarfimmili kikkunnut tamanut sulisuusunut atuupput.

Suliffeqarfimmi ataatsimi suliamik ingerlatsisitsillutik sulisitsisut arlallit akornanni suleqatigiinnissaq pillugu malittarisassat aamma namminersortunut sulisoqanngitsuusunut atuupput.

Suliffimmi ataatsimi suliaqartitsillutik sulisitsisut arlallit, suliffeqarfimmilu kikkut tamarmik sulisuusut sulisunut tamanut sullivinni pissutsinik isumannaatsunik peqqinnartunillu pilersitsinissamik suleqatigiissapput. Paasinerluisoqannginnissamik pakkersimannittussanik, aammalu isumannaallisaanermik sulinermik erseqqissaasussanik malittarisassiornissaq pisariaqarsinnaavoq. Inissisimaffinni tamani suleqatigiinneq sunniuteqarluartumik ingerlanneqassappat tamanna siunertamut naleqquttuuvoq.

Suleqatigiinnermut isumannaallisaaniaqatigiit ilanngunnissaat aamma pisariaqassaaq.

Suliffigisami sulianut ataasiakkaanut aarleqqutaasinnaasutut attuumassuteqartut pillugit sulisitsisut imminnut paasisitsissuteqassapput. Sulisitsisup suliamik ingerlataqanngitsup nammineq sulisuminut naleqqiullugu sunik ajornartorsiuteqarneranik paasinninnermigut iliuuseqarsinnaanissaanik malittarisassaq isumannaarissaaq. Sulisitsisut ataasiakkaat sulisuminnut paasissutissiissutinik taakkuninnga ingerlatitseqqinnissaminnut pisussaatitaapput.

Suliffeqarfimmi ataatsimi, sulisitsisut arlallit suliamik ingerlataqarfigisaanni kikkut tamarmik, tassalu sulisorisat sulisitsisullu namminneq suliaminnut atuuttunik malittarisassat, aammattaarlu sulisitsisut assigiinngitsut akornanni suleqatigiinnikkut malittarisassat najoqqutaralugit suliaqassapput, taamaalilluni suliffeqarfimmi suliaqarnermik atuuffiusut tamarmik isumannaallisaanikkut peqqinnissamullu atatillugu isumannaalluinnartumik ingerlanneqarsinnaanissaat isumannaarneqassammat.

Suliffeqarfiup allap immikkoortortaqarfiani sulisut sulisitsisullu suliaqartuusut suliamut isumagisassaminnut atuuttunik malittarisassat najoqqutaralugillu suliffeqarfimmi suliffigisaminni isumannaallisaanermut peqqinnissamullu malittarisassat atuuttut aamma najoqqutarissavaat.

Jens Jensen

Aammattaaq Sullivinnik Nakkutilliisoqarfiup makkununnga ilitsersuutai atuakkit:

(1) Suliffiugallartuni aamma paarlakaattuni suliffinni, taakkununnga ilanngullugit illuliornermik sanaartornermillu suliffinni isumannaallisaanermik peqqinnissamillu suliaqarneq
(2) Isumannaallisaanermik suleqatigiissitat aamma isumannaallisaanermik sinniisut
(3) Isumannaallisaanermut ataatsimiititat
(4) Suliffeqarfiit isumannaallisaanikkut peqqinnissakkullu suliaat pillugit isumaqatigiissutit

Jens Jensen

Allassimasut pdf-inngorlugit