Ilinniartitaaneq aamma sungiusartitaaneq

Sulisitsisutut immikkut akisussaafeqarput inuusuttunik sulisoqartitsinermi sungiusarluartitsinissamut.

Taamaattumik sulliviup isumagissavaa inuusuttup sungiusarluarneqarlunilu ilitsersorluarneqarnissaa, ilitsersorneqarneralu ingerlaartuartussaavoq. Ajutoornerit amerlasuut, sulilernerup aallartilaarnerani pisarput, taamaattumillu pingaarpoq inuusuttut sungiusarluarneqarnissaat ilisaritinneqarnissaallu, suliassanik isumannaallisaatinik maleruagassanillu.

Sulisitsisoq naliliisussaavoq, inuusuttut sillimaniarnikkut peqqinnissakkullu isumannaalluinnartumik suliassaq suliarisinnaaneraat. Inuusuttup nakkutigilluarneqarnissaa inummik 18-ileereersumik suliaanillu ilisimannittumik isumannaarneqassaaq. Taamaattumik isumatsialaasinnaavoq inuusuttoq utoqqaanerusumik ataatsimoortinneqaassappat.