Apeqqutit akissutaallu

Suliffiit tamarmik sullivinnik nalilersuinermik (APV-mik) suliaqassappat

Aap, 1. januar 2009 aallartiffigalugu suliffeqarfiit tamarmik atorfinitsitaqartut allassimasamik sullivimmik nalilersuinermik – ulluinnarnik APV-mik taasamik – suliaqarnis-samut pisussaati-taalissapput.

Namminersortut aamma APV-liussappat?

Naagga, namminersortut atorfinitsitaqanngitsut, soorlu siunnersortit namminersortut, imaluunniit mesterit APV-mik piumasaqaammut attuumassuteqanngillat.

Ilaqutariittut suliffeqarfiutit APV-liussappat?

Naagga, ilaqutariit suliffeqarfiutaat, tassalu sulisitsisup kiisalu meeraata aapparisaatalu suliffigisaat allanillu sulisoqanngitsut APV-mik suliaqassanngillat.

Suliffiugallartunut APV-liortoqartussaassava?

Aap, suliffiit atorfinitsitaqartut tamarmik APV-mik piumasaqaammut attuumassuteqarput.

APV sumut atorneqarsinnaava?

Suliffeqarfiup sullivinnik nalilersuineq makkununnga atorsinnaavaa:

  • Sullivimmi avatangiisini ajornartorsiutit ersarinnerulersissinnaavai
  • Ajornartorsiutinut aaqiissutissatut siunnersuutinik innersuisinnaavoq
  • Sullivimmi avatangiissini aaqqissuussamik pinaveersaartitsisumillu suliaqartitsisinnaavoq.

APV-liornermi kikkut peqataassappat?

Sullivinnik avatangiisinik nalilersuineq aqutsisut sulisullu suleqatigiinnerisigut suliarineqassaaq.

Suliffeqarfinni isumannaallisaanermik aaqqissuisoqarnissamik piumasaqaateqarfiusuni isumannaallisaanermik aaqqissuisoqatigiit peqataaginnavissaapput suliap ingerlaarnerani.

Suliffeqarfinni isumannaallisaanermik aaqqissuisoqarnissamik piumasaqaateqarfiunngitsuni taamatuttaaq sulisut nalilersuinermut peqataatinneqartassapput.

APV-missaaq inuusuttut piffissallu ilaannaani sulisorisaat peqataatinneqassappat?

Aap, APV-mik piumasaqaammut sulisut tamarmik ilaapput. Tassalu APV-liornermi sulisut sullivimminni avatangiisaat naliliiffigineqassapput.

Qanoq akulikitsigisumik APV-liortoqartassava?

Minnerpaamik ukiut pingajuanni sullivimmik nalilersuineq naleqqussarneqartassaaq. Aammattaaq sulinermi, suleriaatsini allannguuteqartoqarpat, allannguutillu tamakku sulinermi avatangiisinut pingaaruteqarpata nalilersorneqartassaaq.

APV Sullivinnik Nakkutilliisoqarfimmut nassiunneqassava?

Naagga, suliffeqarfiup sullivimmik nalilersuineq nammineq atortorivaa.

Sullivimmik nalilersuineq suliffeqarfimmiissaaq - atorneqarsinnaassallunilu Sullivinnik Nakkutilliisoqarfimmit, aqutsisunit, sulisitsisunit sulisunillu tamanit.