Accept af cookies fra at.gl

At.gl benytter cookies til flere formål - fx. til at forbedre brugernes oplevelse af hjemmesiden.

 

Suleqatit

Sullivinnik Nakkutilliisoqarfik ilaatigut Kalaallit Nunaanni suliffeqarnermut attuumassuteqartunik Kalaallit Nunaanni Suliffigissaasuni suleqateqarpoq.

Suliffigissaasut suliassaat pingaarneq tassaavoq sullivinni avatangiisit isumannaatsuunissaannik peqqinnartuunissaannillu suliniuteqarnermut suliffeqarnermut attuumassutillit sunniuteqalersissallugit. Sullivinni avatangiisit saqqumilaalersinniarneqarneranni sulisitsisut sulisartullu kattuffii Suliffigissaasut aqqutigalugit peqataatinneqarput. Taamatuttaaq suliassaqarfiit aalajangersimasut sorliit Sullivinnik Nakkutilliisoqarfimmit sammineqartariaqarnerinut kattuffiit nalileeqataasinnaapput.

Suliffigissaasut suliassaat makkuupput:

  • Sullivinni avatangiisinut tunngassuteqartunik ilisimasat siammarterneqarnerinut Suliffigissaasut peqataassapput.
  • Apeqqutit sullivinni avatangiisinut pingaaruteqartutut isumaqarfigineqartut Suliffigissaasunit nammineq suliniuteqarnikkut oqaluuserineqartassapput, tamannalu pillugu suliffissaqartitsinermut ministerimut, Naalakkersuisunut aamma Sullivinnik Nakkutilliisoqarfimmut oqaaseqaateqartassallutik.
  • Inatsisit allannguutissaat malittarisassallu nutaat kiisalu suliassat ataasiakkaat suliffissaqartitsinermut ministerimit, Naalakkersuisunit imaluunniit Sullivinnik Nakkutilliisoqarfimmit Suliffigissaasunut saqqummiunneqartut pillugit Suliffigissaasut oqaaseqaateqartassapput siunnersuuteqartassallutillu.
Taamatuttaaq Sullivinnik Nakkutilliisoqarfik pillugu naammagittaalliuutit oqaaseqarfigisassanngorlugit Suliffigissaasunut saqqummiunneqartassapput.

Suliffigissaasut makkuninnga inuttaqarput:
  • Siulittaasoq, suliffeqarnermut attuumassuteqartut oqaaseqaateqareernerisigut Naalakkersuisunit toqqarneqartoq.
  • Ilaasortat marluk Sulinermik Inuussutissarsiuteqartut Kattuffiannit (SIK) toqqarneqartut
  • Ilaasortaq ataaseq Perorsaasut Ilinniarsimasut Peqatigiiffiannit (PIP), Peqqissaasut Kattuffiannit (PK) aamma Ilinniartitsisut Meeqqat Atuarfianneersut Kattuffiannit (IMAK) ataatsimoorussamik toqqarneqartoq
  • Ilaasortaq ataaseq Atorfillit Kattuffiannit (AK) aamma Kalaallit Nunaanni Ilinniagartuut Kattuffiannit (ASG) ataatsimoorussamik toqqarneqartoq
  • Ilaasortaq ataaseq Sulisunik Siulersuisut Kattuffiannit (SSK) toqqarneqartoq
  • Ilaasortaq ataaseq Sulisitsisut Peqatigiiffiannit (GA) toqqarneqartoq
  • Ilaasortaq ataaseq Kalaallit Nunaanni Kommuneqarfiit Kattuffiannit (KANUKOKA) toqqarneqartoq
  • Ilaasortaq ataaseq Finansministeriet isumasioqatigalugu Kalaallit Nunaanni Naalakkersuisunit toqqarneqartoq.

Sullivinnik Nakkutilliisoqarfik Suliffigissaasunut allattoqarfittut atuuppoq.

Tamatuma saniatigut Sullivinni Avatangiisit Pillugit Ilinniartitaaneq Suliffigissaasut ataanni pilersinneqarsimasoq pillugu Aqutsisoqatigiinni Sullivinnik Nakkutilliisoqarfik suleqataavoq. Aqutsisoqatigiinnit ilaatigut isumannaallisaanermi pikkorissaanerit, atuartitsissutinik nalilersuisarnermilu atortunik ineriartortitsinerit ilitsersuisartullu ilinniartitaanerat isumagineqartarput.

Politiit

Sullivinnik Nakkutilliisoqarfik assersuutigalugu politiinik suleqateqartarpoq pissutsini nunap isorartussusia tunngavigalugu Sullivinnik Nakkutilliisoqarfiup sumiiffimmut ornigukkasuarfigisinnaanngisaanni politiit misissuinissaannik pisariaqartitsiviusuni. Pissutsit tamakku tassaasinnaapput ajutoortoqarsimaneranik imaluunniit inatsisinik unioqqutitsisoqarsimaneranik Sullivinnik Nakkutilliisoqarfiup nalunaarutinik tigusaqarfigisimasai.